Իտալիայում շարունակվում են ձմեռային Օլիմպիական խաղերը, որոնք, սակայն, ավարտվեցին Հայաստանի ներկայացուցիչների համար։
Հայաստանն այս ստուգատեսին ներկայացված էր հինգ մարզիկով՝ գեղասահքում, լեռնադահուկային սպորտում և դահուկավազքում։
Գեղասահք
Սպորտային զույգերի պայքարում Հայաստանը ներկայացնող Կարինա Ակոպովա-Նիկիտա Ռախմանին զույգն ազատ ծրագրում վաստակել էր 114.39 միավոր։ Կարճ ծրագրից հետո նրանք ունեին 66.27 միավոր և երկու ծրագրի հանրագումարում՝ 180.66 միավորով զբաղեցրել են 14-րդ հորիզոնականը։ Կարճ ծրագրի շրջանակում Ակոպովան և Ռախմանինը ներկայացել էին Արա Գևորգյանի «Արցախ» ստեղծագործության հնչյունների ներքո։
Լեռնադահուկային սպորտ
Լեռնադահուկորդ Հարություն Հարությունյանը ոլորավայրէջք մրցաձևի առաջին մրցահերթում ցույց էր տվել 1:10.12 ժամանակ և ընթացել 37-րդ տեղում, սակայն երկրորդ փորձի ժամանակ թույլ տված խախտման պատճառով որակազրկվել է և դուրս մնացել հետագա պայքարից։
Ավելի վաղ նա հանդես էր եկել հսկա ոլորավայրէջք մրցաձևում՝ 1:21.67 արդյունքով 81 մասնակիցների թվում գրավելով 59-րդ տեղը։
Դահուկավազք
Հայաստանի հավաքականի անդամ Միքայել Միքայելյանը 10 կմ ինտերվալ (ազատ ոճ) մրցաձևում 23:06.4 արդյունքով զբաղեցրել է 53-րդ տեղը։ 20 կմ սկիաթլոնում (դասական/ազատ ոճ) նա 73 մասնակիցների թվում գրավել է 48-րդ տեղը՝ 51:06 արդյունքով։
Կանանց 10 կմ ինտերվալ (ազատ ոճ) մրցաձևում Կատյա Գալստյանը 28:33 արդյունքով 111 մասնակիցների շարքում զբաղեցրել է 82-րդ տեղը։ Նա մասնակցել է նաև 20 կմ սկիաթլոն մրցաձևին, սակայն առաջին 10 կմ դասական ոճն անցնելուց հետո չի հատել եզրագիծը։
Հայաստանի մասնակցությունը
Թեև հայ մարզիկներին չհաջողվեց նվաճել մեդալ, նրանք հանդես եկան տարբեր մրցաձևերում՝ գրանցելով իրենց լավագույն արդյունքները և ներկայացնելով երկիրը միջազգային խոշորագույն մարզական հարթակում։
