ՀՀ զինված ուժերում դադարեցվելու է Հայ Առաքելական եկեղեցու կողմից նշանակված հոգևոր ծառայության ներկայացուցիչների գործունեությունը։ Համապատասխան որոշումը կայացրել է Պաշտպանության նախարար Սուրեն Պապիկյանը։
Նախարարի կողմից հրապարակված փաստաթղթի համաձայն՝ Պաշտպանության նախարարությունում Հայ Առաքելական եկեղեցու կողմից նշանակված հոգևոր ծառայության առաջնորդի և հոգևոր ծառայողների գործունեությունը դադարեցվելու է 2026 թվականի փետրվարի 1-ից։
Որոշմամբ նաև ուժը կորցրած է ճանաչվում Պաշտպանության նախարարի 2000 թվականի հուլիսի 19-ի՝ «ՀՀ զինված ուժերում Հայաստանյայց Առաքելական եկեղեցու հոգևոր ծառայության մասին» հրամանը։ Ավելին, բանակում հոգևոր ծառայության կազմակերպումը, փաստացի, փոխանցվում է Զինված ուժերի գլխավոր շտաբի բարոյահոգեբանական ապահովման վարչության ընդհանուր իրավասությանը՝ մինչև որոշման ուժի մեջ մտնելը։
Զինված ուժերի գլխավոր շտաբի պետին հանձնարարվել է ապահովել, որ Զինված ուժեր զորակոչված հոգևորականների հոգևոր ծառայությունն իրականացվի Գլխավոր շտաբի բարոյահոգեբանական ապահովման վարչության շրջանակներում։ Որոշման ուժի մեջ մտնելուց հետո Զինված ուժերում շարքային զինվորական ծառայության անցած հոգևորականներն ուսումնական ծրագրի ավարտից հետո կնշանակվեն գնդերեցներ և ավագ գնդերեցներ։ Նրանց ծառայության վայրը կորոշվի ստորաբաժանման հրամանատարի առաջարկությամբ և Գլխավոր շտաբի բարոյական և հոգեբանական ապահովմանվարչության հետ խորհրդակցելով։
Պապիկյանը նաև հանձնարարել է եռօրյա ժամկետում ներկայացնել առաջարկներ՝ բանակում հոգևոր ծառայություն իրականացնելու համար գնդերեցի և ավագ գնդերեցի ոչ հրամանատարական պաշտոններ (համապատասխանաբար կապիտանի և մայորի կոչումներով) ներդնելու վերաբերյալ։ Այս պաշտոններում նշանակման պարտադիր պահանջը կլինի Հայ Առաքելական եկեղեցում կրոնական կրթությունը։
Այսօր ավելի վաղ ԱԺ «Հայաստան» խմբակցության պատգամավոր Գեղամ Մանուկյանը հայտնել էր, որ Պապիկյանի հրամանով փետրվարի 1-ից Հայաստանի զինված ուժերում այլևս չի գործելու հոգևոր ծառայությունը։ Տարբեր հոգևորականներ «Ազատության»-ը պատմել էին, որ հրամանատարները ճնշում են գնդերեցներին, փորձում ներքաշել եկեղեցու «բարենորոգման արհեստական շարժման մեջ»:
