ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է ՀՀ վարչապետ Նիկոլ Փաշինյանի հայտարարությունը, ըստ որի՝ եթե ռուս գործընկերները հրաժարվեն մասնակցել Թուրքիայի հետ սահմանին գտնվող Ախուրիկ երկաթուղային հատվածի վերականգնմանը, հայկական կողմը կձեռնարկի նախագիծը։
ՌԴ ԱԳՆ-ում հայտնել են, որ ռուսական կողմը մշտական կապի մեջ է հայ գործընկերների հետ, այդ թվում՝ ԵԱՏՄ-ի շրջանակում, և քննարկում է Երևանից ստացվող բոլոր առաջարկներն ու դիմումները։
Զախարովան նշել է, որ Ախուրիկի երկաթուղային հատվածի վերականգնման հարցը գտնվում է քննարկումների սկզբնական փուլում, այդ թվում՝ «Ռուսական երկաթուղիների» փորձագիտական ներուժի հնարավոր ներգրավմամբ։
«Համատեղ խորհրդակցությունների վերաբերյալ մեր առաջարկը մնում է ուժի մեջ»,- հայտարարել է Զախարովան։
Նա մեկնաբանել է նաև Փաշինյանի՝ Հայոց բանակի օրվա ուղերձը, որում նա մեղադրել էր ՀԱՊԿ-ին Հայաստանի նկատմամբ ունեցած պայմանագրային պարտավորությունները չկատարելու համար։ Փաշինյանը նշել էր, որ ՀԱՊԿ-ին անդամակցությունը խոչընդոտել է միջազգային մի շարք գործընկերների՝ Հայաստանին զենք վաճառելու հարցում։
Զախարովան տարակուսանք է հայտնել ՀԱՊԿ-ի կողմից Հայաստանի հասցեին իբր հնչող սպառնալիքների մասին պնդումների կապակցությամբ և լրագրողին առաջարկել է հստակեցնել, թե կոնկրետ ինչի՞ մասին է խոսքը։
Լրագրողը նշել է, որ Փաշինյանը խոսել է 2021 թվականի իրադարձությունների մասին, երբ Հայաստանի տարածք էր ներխուժել ադրբեջանական զինուծը, ապա 2022-2023թթ. Արցախի մեծ մասն անցել էր Ադրբեջանի վերահսկողության տակ, իսկ Ստեփանակերտը հայտնվել էր շրջափակման մեջ։
Ի պատասխան՝ Զախարովան հիշեցրել է, որ Լեռնային Ղարաբաղը երբևէ իրավաբանորեն չի ճանաչվել Հայաստանի մաս՝ հավելելով, որ «հիշում է, թե ինչպես էր Նիկոլ Վովաևիչն այնտեղ պարում», սակայն չի հիշում Ղարաբաղի՝ Հայաստանի մաս ճանաչման որևէ իրավական փաստ։
Զախարովան նաև հայտարարել է, որ չի հասկանում, թե ՀԱՊԿ-ի ո՞ր որոշումների մասին կարող է խոսք լինել, որոնք, իբր, ուղղված են հայկական պետականության դեմ։
2025 թվականի դեկտեմբերին Փաշինյանը հայտարարել էր, որ Հայաստանը դիմել է Ռուսաստանին՝ Թուրքիայի և Ադրբեջանի հետ սահմանին գտնվող երկաթուղային հիմնական հատվածները վերականգնելու խնդրանքով։
Կարդացեք նաև՝
ՀՀ-ն մտադիր է խորացնել համագործակցությունը ՌԴ-ի հետ՝ հաղորդակցությունների ապաշրջափակման հարցում․ Փաշինյան
