ՀՀ ԱԳ նախարար Արարատ Միրզոյանն Ստրասբուրգում՝ Եվրոպայի խորհրդին Հայաստանի անդամակցության 25-ամյակին նվիրված միջոցառմանն իր ելույթում, անդրադարձել է գերիների հարցին, խաղաղության պայմանագրի գործընթացին, ինչպես նաև տարածաշրջանային կայունությանն ու ՀՀ ԱԺ առաջիկա ընտրություններին։
Գերիների վերադարձի մասին
«Չորս հայ գերիների ազատ արձակումը հույս է տալիս, որ հաջորդիվ կլուծվի նաև Ադրբեջանում դեռ պահվող մնացած 19 անձի ազատման հարցը»,- ընդգծել է Միրզոյանը՝ հավելելով, որ կշարունակվեն նաև քայլերն անհետ կորածների ճակատագրի պարզաբանման ուղղությամբ։
«Ենթադրում ենք, որ հիբրիդային հարձակումները շարունակաբար է՛լ ավելի կսրվեն»
Խոսելով հիբրիդային հարձակումների մասին՝ նախարարը նշել է, որ ՀՀ-ն պատրաստակամ է օգտագործել ժողովրդավարության առաջ քաշած գործիքները՝ ժողովրդավարությունը պաշտպանելու համար:
«Անշուշտ, ենթադրում ենք, որ հիբրիդային հարձակումները շարունակաբար է՛լ ավելի կսրվեն, մինչև մենք մոտենում ենք ընտրություններին, միևնույն ժամանակ՝ իմունիտետ ենք ձևավորել: Լավ լուրն այն է, որ մենք ապրել ենք այս միջավայրում, որտեղ կային հիբրիդային սպառնալիքներ վերջին 4-5 տարիներին, մենք ականատես ենք դարձել և գոյատևել, առերեսվել ենք բռնի ցույցերին և հիբրիդային հարձակումների այլ դրսևորումներ»,- ասել է ՀՀ արտաքին քաղաքական գերատեսչության ղեկավարը:
Պատասխանելով ռումինացի պատվիրակի հարցին, թե ինչպե՞ս ԵՄ-ն կարող է օգնել ՀՀ-ին այս առումով, Միրզոյանը նշել է, որ Եվրոպայի խորհուրդը կարող է կանգնել Հայաստանի կողքին՝ արտահայտելով պատրաստակամություն և ցույց տալով աջակցություն ՀՀ ժողովրդավարությանը:
«Եվ մենք վստահ ենք, որ միասին և համատեղ կհաղթահարենք բոլոր հնարավոր հիբրիդային հարձակումները», - հավելել է արտգործնախարարը:
«Հոգևորականների հալածանք չկա Հայաստանում»
Ստրասբուրգում անդրադարձ է կատարվել նաև իշխանության և Հայ Առաքելական եկեղեցու հարաբերություններին: Պատվիրակներից մեկը հարցրել է, թե արդյոք վարչապետ Նիկոլ Փաշինյանի քայլերը կրոնական ազատության խախտում չե՞ն: Ի պատասխան՝ Միրզոյանը նշել է, որ սա բամբասանք է, որը պետք է հստակեցվի:
«Ցավում եմ, որ Ձեր տեղեկատվությունն ամբողջապես ճշմարիտ չէ: Հոգևորականների հալածանք չկա Հայաստանում»,- ընդգծել է նա:
Փաշինյանը 2025-ից պահանջում է Ամենայն Հայոց կաթողիկոս Գարեգին Երկրորդի հրաժարականը՝ հայտարարելով, որ նա զավակ ունի և խախտել է կուսակրոնության ուխտը։ Փաշինյանի հետ 10 եպիսկոպոսի հանդիպումից հետո, ովքեր ևս պահանջում են կաթողիկոսի հրաժարականը, ՀՀ իշխանություններն ուժեղացրել են եկեղեցու վրա ճնշումը։ Հունվարի 5-ին Փաշինյանը և տասը եպիսկոպոս հանդես էին եկել հայտարարությամբ, որում ներկայացրել էին եկեղեցու բարենորոգման ճանապարհային քարտեզ և հայտնել Համակարգող խորհրդի ձևավորման մասին: Ներկայումս երեք արքեպիսկոպոս և մեկ եպիսկոպոս ազատազրկված է:
Հայաստան-Թուրքիա հարաբերություններ և սահմանի բացման հնարավոր ժամկետներ
Միրզոյանը նիստի հարցուպատասխանի ընթացքում նշել է, որ Հայաստանը հանձնառու է շարունակել Թուրքիայի հետ հարաբերությունների կարգավորման գործընթացը։
ԱԳ նախարարը հայ-թուրքական սահմանի հնարավոր ժամկետների մասին է հայտարարել։
«Հուսով եմ՝ գալիք օրերին կամ շաբաթներին Հայաստան-Թուրքիա սահմանի գոնե մասնակի բացում կտեսնենք և այնուհետև լիովին կբացենք սահմանը»,- շեշտել է Միրզոյանը։
Թուրքական լրատվամիջոցներն ավելի վաղ փոխանցել էին՝ հայ-թուրքական սահմանի «Ալիջան» սահմանային անցակետում աշխատանքները 90%-ով ավարտված են։
