Նավթի համաշխարհային շուկան շարունակում է գտնվել բարձր տատանողականության և անորոշության պայմաններում Հորմուզի նեղուցի փաստացի փակման ֆոնին, որը շարունակվում է արդեն ավելի քան երեք ամիս, հայտնել է ԱՄՆ էներգետիկայի նախարարությունը:
Գերատեսչության տվյալներով՝ նավերի տեղաշարժը Հորմուզի նեղուցով, որը նավթի տեղափոխման աշխարհի առանցքային երթուղիներից մեկն է, մնում է խիստ սահմանափակ՝ փետրվարի 28-ին ռազմական գործողությունների մեկնարկից ի վեր։ Տարածաշրջանում նավթի արդյունահանման մեծ մասը դեռևս դադարեցված է, իսկ նավթի համաշխարհային պաշարները շարունակում են նվազել՝ պահանջարկը բավարարելու համար։
Brent տեսակի նավթի միջին սփոթ գինը մայիսին կազմել էր մեկ բարելի դիմաց 107 դոլար, ինչը 10 դոլարով ցածր էր ապրիլի ցուցանիշից։ Գերատեսչությունում նշել են, որ գներն իջել են ԱՄՆ-ի և Իրանի հնարավոր համաձայնության մասին հաղորդումների ֆոնին, որը վերաբերում է հրադադարի երկարաձգմանը և Հորմուզի նեղուցի աշխատանքի վերականգնմանը։ Միևնույն ժամանակ, համաձայնագիր դեռ չի կնքվել։ OilPrice.com-ի տվյալներով՝ Brent տեսակի նավթը վաճառվում է մեկ բարելի դիմաց շուրջ 91 դոլար, WTI-ն՝ շուրջ 88 դոլար։
ԱՄՆ էներգետիկայի նախարարության կանխատեսմամբ՝ Հորմուզի նեղուցը փաստացի փակ կմնա մինչև ամռան սկիզբ, իսկ նավթի մատակարարումները կսկսեն աստիճանաբար վերականգնվել 2026 թվականի երրորդ եռամսյակում։ Նման սցենարի դեպքում արդյունահանման և առևտրային երթուղիների վերադարձը հակամարտությունից առաջ գրանցված մակարդակին կարող է տևել մինչև 2027 թվականի սկիզբ։ Միևնույն ժամանակ, Պարսից ծոցի շրջանում արտադրողների մի մասը չի կարողանա կանխատեսվող ժամանակահատվածում վերականգնել արդյունահանումը նախկին մակարդակներին։
Մերձավոր Արևելքում դադարեցված նավթարդյունահանման ծավալը մայիսին գնահատվել էր օրական 11,3 մլն բարել։ Գերատեսչությունում ակնկալում են, որ ցուցանիշը կշարունակի աճել 2026 թվականի երկրորդ եռամսյակում, քանի որ նավթապահեստները, հատկապես Իրանում, մոտենում են առավելագույն լցվածության։
Մինչ հակամարտության սկիզբը համաշխարհային շուկան պատրաստ էր նավթի մատակարարումների կարճաժամկետ խափանումներին՝ առաջարկի ավելցուկի և կուտակված պաշարների շնորհիվ։ Սակայն հակամարտության ձգձգմանը զուգահեռ՝ համաշխարհային պաշարներն ավելի հաճախ են օգտագործվում պահանջարկը բավարարելու համար։
Գերատեսչության կանխատեսմամբ՝ Տնտեսական համագործակցության և զարգացման կազմակերպության (ՏՀԶԿ) երկրներում հեղուկ վառելիքի պաշարները մինչև 2026 թվականի դեկտեմբեր կարող են նվազել մինչև 2,3 մլրդ բարելից մի փոքր ցածր մակարդակի։ Դա կլինի նվազագույն ցուցանիշը 2003 թվականից ի վեր։ Ապագա պահանջարկի օրերի հաշվարկով՝ ՏՀԶԿ-ի պաշարները մինչև 2026 թվականի վերջ կարող են կրճատվել մինչև 50 օրվա։ Ակնկալվում է, որ դրանք կանխատեսվող ժամանակահատվածում չեն վերադառնա մինչհակամարտային մակարդակին։
ԱՄՆ-ի և Իսրայելի ռազմական գործողությունն Իրանի դեմ փետրվարի 28-ին զգալիորեն խաթարել էր նավագնացությունը Հորմուզի նեղուցում։ Իրանը հայտարարել էր նեղուցի փակման մասին, ինչպես նաև սկսել էր անցման վճար գանձել։ Իրանում նաև հայտարարել էին Հորմուզի նեղուցի նկատմամբ լիակատար վերահսկողության մասին։
