Վարչապետ Նիկոլ Փաշինյանի հետ վեճից հետո կալանավորված, ապա հացադուլ հայտարարած արցախցի գործիչ Արթուր Օսիպյանի առողջական վիճակը գնալով վատթարանում է, Armenia Today-ին հայտնել է նրա փաստաբան Դավիթ Հովհաննիսյանը։
«Շատ ծանր է, հյուծված, քաշի կորստով, վերջին անգամ մեկ շաբաթ առաջ է բժշկական զննություն անցել»,-նշել փաստաբանը։
Ըստ Հովհաննիսյանի՝ վերջին զննությունից հետո Օսիպյանն ի նշան բողոքի՝ հրաժարվել է նաև բժիշկների այցերից։
Արձագանքելով մի խումբ հասարակական գործիչների հայտարարած նախաձեռնությանը, որով նրանք երաշխավորություն են ցանկանում ներկայացնել Օսիպյանի խափանման միջոց կալանքը փոխելու վերաբերյալ, Հովհաննիսյանը նշել է, որ իրենց կողմից դեռևս երկու շաբաթ առաջ էր միջնորդություն ներկայացվել դատարան, բայց դատական նիստ նշանակված չէ։
Օսպիյանը ձերբակալվել էր Երևանի Արաբկիր վարչական շրջանում Փաշինյանի հետ վիճաբանությունից հետո։ Քաղաքական գործիչը պնդել էր, թե Փաշինյանը տեղյակ էր Արցախի նախկին նախագահ Արայիկ Հարությունյանի կողմից բաժանվող ընտրակաշառքների մասին, սակայն, չնայած դրան, աջակցել էր նրան։ Միջադեպի ընթացքում վարչապետը դիմել էր Օսիպյանին՝ հետևյալ խոսքերով. «Գնայիր, զոհվեիր, դու խի՞ ես կենդանի, ռադդ քաշի, համբալի մեկը»։
Մայիսի 21-ին Օսիպյանին կալանավորել են, որից հետո նա հացադուլ էր հայտարարել։
Ավելի ուշ՝ մայիսի 29-ին արցախցի գործիչը վարչապետից պահանջել է ներողություն խնդրել իրենից և այն արցախցիներից, որոնք, նրա խոսքով, չեն խուսափել պատերազմից և ստիպված են լքել Արցախը։
