Ինչպես Ղարաբաղում և Լիբիայում. Էրդողանն Իսրայելին սպառնացել է ռազմական միջամտությամբ

Թուրքիայի նախագահ Ռեջեփ Թայիփ Էրդողանն Իսրայելին մեղադրել է Պաղեստինում և Լիբանանում վայրագություններ իրականացնելու մեջ և սպառնացել հնարավոր ռազմական միջամտությամբ՝ վկայակոչելով Լեռնային Ղարաբաղում և Լիբիայում Թուրքիայի նախկին գործողությունները, փոխանցում է Jerusalem Post-ը։

Ստամբուլում Ասիական քաղաքական կուսակցությունների համաժողովում ելույթ ունենալով՝ Էրդողանը մեղադրել է Իսրայելին Պաղեստինի և Լիբանանի դեմ վայրագությունների մեջ։ Նա հիշեցրել է, որ քաղաքացիական թիրախների վրա հարձակումները 1,2 միլիոն լիբանանցիների ստիպել են լքել իրենց տները՝ չնայած շարունակվող հրադադարին։

«Մենք պետք է ուժեղ լինենք, որպեսզի թույլ չտանք Իսրայելին նման բան անել Պաղեստինի հետ։ Ինչպես մտանք Ղարաբաղ, ինչպես մտանք Լիբիա, նույնը կանենք նաև նրանց հետ։ Չկա ոչինչ, որ մեզ կխանգարի դա անել»,- հայտարարել է Թուրքիայի նախագահը։

Իսրայելի ժառանգության նախարար Ամիխայ Էլիյահուն խստորեն դատապարտել է Էրդողանի հայտարարությունները՝ նրան մեղադրելով կեղծավորության մեջ։ Նախարարը հիշեցրել է Թուրքիայի կողմից Հյուսիսային Կիպրոսի գրավումը, քրդերի նկատմամբ վերաբերմունքը և Հայոց ցեղասպանությունը։

Իսրայելցի պաշտոնյան կոչ է արել երկրի կառավարությանը վերջնականապես խզել դիվանագիտական հարաբերությունները Թուրքիայի հետ։

Թուրքիան նշանակալի դեր էր խաղացել 2020 թվականի աշնանն Արցախում տեղի ունեցած 44-օրյա պատերազմում՝ Ադրբեջանին տրամադրելով համապարփակ ռազմական, քաղաքական և տեղեկատվական աջակցություն։ Հակամարտության առաջին իսկ օրերից Անկարան հրապարակավ հայտարարել էր Բաքվի հետ իր լիակատար համերաշխության մասին, իսկ Էրդողանը հետևողականորեն ընդգծել էր իր պատրաստակամությունը՝ աջակցելու Ադրբեջանին «բոլոր անհրաժեշտ միջոցներով»։

Անկարան Բաքվին ռազմական օգնություն էր ցուցաբերել, որոնց թվում էին՝ զենք և անօդաչու թռչող սարքեր, մասնավորապես՝ «Բայրաքթար» գրոհային անօդաչու թռչող սարքեր։ Ավելին, հաղորդվել էր գործողությունների պլանավորման և համակարգման մեջ ներգրավված թուրք ռազմական մասնագետների և խորհրդատուների մասնակցության մասին։

Սիրիայից Ադրբեջան վարձկանների տեղակայման մասին հաղորդագրությունները հատուկ ուշադրություն էին գրավել միջազգային օրակարգում: Այս մասին հայտնել էին մարդու իրավունքների պաշտպանությամբ զբաղվող կազմակերպությունները, այդ թվում՝ Մարդու իրավունքների սիրիական դիտարանը, ինչպես նաև մի շարք քաղաքական գործիչներ, այդ թվում՝ Ֆրանսիայի նախագահ Էմանուել Մակրոնը: Անկարան և Բաքուն հերքել էին նման մեղադրանքները։