Armenia Today-ի տեղեկություններով՝ ձերբակալվել է ՀՀ էկոնոմիկայի նախկին նախարար Վահան Քերոբյանը՝ հանցավոր կազմակերպության կազմում առանձնապես խոշոր չափերով փողերի լվացման և հափշտակությանն առնչվող վարույթի նախաքննության շրջանակում։
Մեր տեղեկություններով՝ վարույթը նախաձեռնվել է ՀՀ քննչական կոմիտեում։ ՔԿ-ն նոյեմբերի 7-ին հայտնել է, որ գործով 12 անձի վերաբերյալ կայացվել է ձերբակալման որոշում, որոնցից 7-ը ձերբակալվել են (նրանց թվում է Քերոբյանը-խմբ․)։
Ըստ ՔԿ հաղորդագրության՝ բացահայտվել է հանցավոր կազմակերպություն, որը 2008-2014 թվականներին կեղծ փաստաթղթերով հողատարածքներ է յուրացրել։ Նշվում է, որ նրանց բնակարաններում կատարվել է ավելի քան տասը խուզարկություն, որի արդյունքում հայտնաբերվել են գործի համար նշանակություն ունեցող առարկաներ և ապացույցներ։
Նախաքննությամբ պարզվել է, որ գինու-կոնյակի գործարանի սեփականատեր Հ.Մ.-ն Կադաստրի նախկին պաշտոնյայի և մի շարք ընկերությունների փաստացի սեփականատեր Գ.Ա.-ի հետ կեղծ փաստաթղթերով Երևանի համայնքային գույքային ֆոնդից ապօրինի դուրս է բերել 40, 19,3 և 14,5 հա հողատարածքներ՝ ձևակերպելով դրանք փոխկապակցված անձանց անունով։
«Հանցավոր կազմակերպության անդամները նշված անշարժ գույքերն իրենց հետ փոխկապակցված ընկերությունների միջոցով տարբեր ժամանակահատվածներում գրավադրել են տարբեր առևտրային բանկերում՝ ստանալով 10 մլն և ավելի դոլարի վարկեր»,- ասված է հաղորդագրության մեջ։
ՔԿ-ից հավելել են, որ Կադաստրի նախկին պաշտոնյան, չարաշահելով պաշտոնեական լիազորությունները և կեղծ փաստաթղթեր պատրաստելով, հանցավոր խմբին ապահովել է համայնքային հողերի կեղծ սեփականության վկայականներով, որոնք հետագայում օգտագործվել են փողերի լվացման նպատակով։ Ըստ ՔԿ-ի՝ խմբի անդամները, գիտակցելով հողերի հանցավոր ծագումը, շարունակել են գործել՝ իրականացնելով կազմակերպության վերջնական նպատակները։
Կոմիտեն 6 անձի նկատմամբ հարուցել է հանրային քրեական հետապնդում։ Նրանցից ոմանք մեղադրվում են հանցավոր կազմակերպություն ստեղծելու կամ մասնակցելու (առավելագույն պատիժն ազատազրկում՝ 8 տարով-խմբ․), մյուսները՝ առանձնապես խոշոր չափերով խարդախության (առավելագույն պատիժն ազատազրկում՝ 12 տարով-խմբ․), փողերի լվացման (առավելագույն պատիժն ազատազրկում՝ 12 տարով-խմբ․), պաշտոնեական կեղծիքի և լիազորությունների չարաշահման համար (միասին առավելագույն պատիժն ազատազրկում՝ 12 տարով-խմբ․)։
Քերոբյանն Էկոնոմիկայի նախարարի պաշտոնն զբաղեցրել էր 2020-2024 թվականներին։ Պաշտոնանկությունից հետո նրա նկատմամբ քրեական հետապնդում էր հայտարարվել՝ կապված նախարար լինելու ժամանակ իրականացված գնումների գործընթացներում առերևույթ չարաշահումների հետ։ Քերոբյանը մեղադրվում էր պաշտոնեական լիազորությունները չարաշահելու մեջ, որի համար 2024-ին 4 ամսով տնային կալանքի տակ էր։
