Քննարկումներն այն մասին, որ 2026 թվականի սեպտեմբերից Հայաստանում նախատեսվում է փակել 231 դպրոց, չեն համապատասխանում իրականությանը և հանդիսանում են ապատեղեկատվություն, հայտարարել է ԿԳՄՍ նախարարությունը։
Ըստ հրապարակման՝ կրթության ոլորտում իրականացվող պետական քաղաքականությունը միտված է հանրակրթության արդյունավետ զարգացմանը, կրթության հասանելիության ընդլայնմանը և որակի բարձրացմանը, այլ ոչ թե կրթական հնարավորությունների սահմանափակմանը։
«Ցավալի է, որ կրթության ոլորտը շահարկվում և թիրախավորվում է՝ հասարակության շրջանում անհիմն անհանգստություն և թյուրըմբռնումներ առաջացնելու նպատակով»,- նշել է նախարարությունը։
Դեկտեմբերին «Մեր ձևով» շարժման համակարգող Նարեկ Կարապետյանը հայտարարել էր, որ Սյունիքի մարզում մոտավորապես 45 դպրոց է փաստացի փակվում: Նա նշել էր, որ դպրոցների միավորումը կարող է արդարացված լինել մեկ համայնքի շրջանակներում, սակայն մի քանի համայնքում դպրոցների փակման և ձմռանը լեռնային ճանապարհներով զգալի հեռավորություններ անցնելու պատճառով իրավիճակն արդեն իսկ կրթական հաստատությունների փաստացի փակման պատճառ է դառնում։
Նախարար Ժաննա Անդրեասյանն Armenia Today-ին մեկնաբանել էր Սյունիքի մարզի Դավիթ Բեկ գյուղի դպրոցի փակման հարցը։
