Հայաստանի ներքին գործերի նախարարության ոստիկանությունը նախազգուշացրել է, այսպես կոչված, առցանց «վճարովի առաջադրանքների» հետ կապված լուրջ ռիսկերի մասին, որոնք վերջին շրջանում ակտիվորեն առաջարկվում են տարբեր ինտերնետ հարթակների և բջջային հավելվածների միջոցով:
Քաղաքացիներին առաջարկում են վարձատրության դիմաց կատարել առաջին հայացքից պարզ գործողություններ՝ լուսանկարել որոշակի վայրեր, օբյեկտներ, փողոցներ կամ պատասխանել կասկածելի հարցումների: Միևնույն ժամանակ, նման առաջադրանքները հաճախ ներկայացվում են որպես «անվնաս» կամ «հետազոտություն»:
Ոստիկանությունում ընդգծում են, որ նման առաջարկները կարող են լուրջ վտանգ ներկայացնել։ Խոսքը, մասնավորապես, պետական կամ ռազմավարական նշանակության օբյեկտների հնարավոր նկարահանման, ենթակառուցվածքների և անվտանգության համակարգերի վերաբերյալ տվյալների հավաքագրման, ինչպես նաև մարդկանց, տրանսպորտային միջոցների կամ մասնավոր տարածքների ամրագրման մասին է։ Շատ դեպքերում կատարողները տեղյակ չեն առաջադրանքների իրական նախաձեռնողների, տեղեկատվության հավաքման նպատակների և դրա հետագա օգտագործման եղանակների մասին, ասվում է հաղորդագրության մեջ:
ՆԳՆ ոստիկանությունը քաղաքացիներին կոչ է արել զերծ մնալ լուսանկարների և տվյալների հավաքագրման հետ կապված առաջադրանքների կատարումից, եթե դրանց նպատակը պարզ չէ կամ կասկած է հարուցում, ինչպես նաև չլուսանկարել պետական, ռազմական, իրավապահ և ռազմավարական նշանակության այլ օբյեկտներ: Գերատեսչությունում ընդգծել են, որ չնչին վարձատրությունը չպետք է կասկածելի գործընթացներում ներգրավվելու առիթ դառնա՝ հիշեցնելով, որ անձնական և պետական անվտանգությունը պետք է մնա քաղաքացու առաջնահերթությունը:
