Կառավարությունը փոփոխություններ է կատարել արցախցի տեղահանված ընտանիքների բնակարանային ապահովման ծրագրում: Երևանամերձ համայնքներում աջակցության չափը սահմանվել է 4 միլիոն դրամ մեկ անձի համար, մարզերում՝ 5 միլիոն, իսկ Երևանում՝ 3 միլիոն դրամ: Փոփոխությունները հետադարձ ուժով կկիրառվեն նաև արդեն իսկ հավաստագիրն իրացրած ընտանիքների համար:
Գործող հիփոթեքային վարկի մարման աջակցությունից կարող են օգտվել նաև այն արցախցիները, որոնք բնակելի անշարժ գույքի ձեռքբերման նպատակով 2025 թվականի հուլիսի 1-ի դրությամբ՝ ստացել են անշարժ գույքի գրավով սպառողական վարկ (հիփոթեքային վարկի վերաֆինանսավորման նպատակով):
Ըստ նախագծի՝ ընտանիքի անդամ կդիտարկվեն մինչև 2026 թվականի դեկտեմբերի 31-ը ներառյալ ծնված երեխաները՝ անկախ նրանից, թե երբ են ներկայացվել դիմում-հայտարարությունները: Մյուս կողմից՝ եթե դիմումատուի տվյալներն առկա են Արցախի անհատական հաշվառման բազայում, և պարզվում է, որ նա մինչև տեղահանումն առնվազն 12 ամիս աշխատել կամ սովորել է Արցախում, ապա նրան շնորհվում է շահառուի կարգավիճակ՝ անկախ այլ փաստաթղթերի առկայությունից:
Նախագծի հիմնավորման մեջ նշվում է, որ 2026 թվականի մարտի 23-ի դրությամբ՝ Արցախից տեղահանված ընտանիքների բնակարանային ապահովման պետական աջակցության ծրագրի շրջանակում 5181 ընտանիք ստացել է հավաստագիր, 2304 ընտանիք արդեն իսկ իրացրել է ստացած հավաստագիրը։
2023 թվականի սեպտեմբերի 19-ին Ադրբեջանը հարձակվել էր Արցախի վրա։ Ռազմական գործողությունների ավարտից հետո Արցախի ամբողջ բնակչությունը բռնի տեղահանվել էր։ Արցախից բռնի տեղահանված 100 632 քաղաքացի էր հասել ՀՀ։ Արցախցիների բնակարանային ապահովման ծրագիրը կառավարությունը մեկնարկել էր 2024-ից։
Կարդացեք նաև՝
Արցախցիներն ինչպե՞ս կարող են օգտվել բնակարան ձեռք բերելու պետական աջակցությունից
Ծրագրից օգտվող արցախցիների քանակը քիչ է ՀՀ քաղաքացիության ցածր դիմելիության պատճառով․ Խաչատրյան
«Երկու տարի առանց Արցախի». սեպտեմբերի 19-ը հայտարարվել է Բռնի տեղահանության և պահանջատիրության օր
Արցախցիների բնակապահովման ծրագիրը պետք է վերանայել․ Արթուր Խաչատրյան
