Կաթոլիկ և Հայ Առաքելական եկեղեցու առաջնորդների մի խումբ կոչ է արել Հռոմի պապ Լևոն XIV-ին ճնշում գործադրել՝ ազատ արձակելու Ադրբեջանում պահվող առնվազն 23 արցախցի հայ բանտարկյալներին՝ վկայակոչելով նրանց վիճակի վատթարացումը և Լեռնային Ղարաբաղում քրիստոնեական ժառանգության ոչնչացումը, հայտնում է The Christian post-ը:
Ուղերձն ուղարկվել է Սուրբծննդյան նախօրեին (կաթոլիկ աշխարհը տոնը նշում է դեկտեմբերի 24-25-ը): Այնտեղ հայ ռազմագերիները բնութագրված են որպես 2023 թվականի սեպտեմբերին Ադրբեջանի կողմից տարածաշրջանի հայ բնակչության նկատմամբ իրականացված էթնիկ զտումների զոհեր: Ավելի քան մեկ տասնյակ ստորագրողների թվում են պաշտոնաթող կարդինալ Թիմոթի Դոլանը՝ Նյու Յորքի Հռոմի կաթոլիկ արքեպիսկոպոսությունից և արքեպիսկոպոս Անուշավան Տանիելյանը՝ Ամերիկայի Հայ Առաքելական եկեղեցու արևելյան առաջնորդարանից:
Նրանք պնդում են, որ ստեղծված իրավիճակը պահանջում է Սուրբ Աթոռի միջամտությունը՝ հաշվի առնելով նրա բարոյական հեղինակությունը և Բաքվի հետ դիվանագիտական կապերը: Նամակում կոչ է արվում պապին անձամբ հանդես գալ գերիների ազատ արձակման օգտին՝ շեշտելով, որ նման կոչը կարող է օգնել վերջ դնել ընտանիքների տառապանքներին, որոնք դեռ սպասում են իրենց սիրելիների մասին լուրերին:
«Նրանց ընտանիքների հետ շփումը, առանց այն էլ սահմանափակ, վատացել է, երբ անցած տարի Ադրբեջանը երկրից արտաքսեց Կարմիր խաչի ներկայացուցիչներին։ Նրանց քրիստոնեական հավատը և մարդկային արժանապատվությունը ոտնահարվում են»,- ասվում է նամակում։
Նամակն ստորագրողները մտահոգություն են հայտնել, որ գերիներին մերժվել է հաղորդակցվելու և տարրական իրավական պաշտպանության հասանելիությունը, ինչպես նաև այն, որ նրանց քրիստոնեական հավատն անազատության մեջ խախտումների է ենթարկվում:
Նամակում հիշատակվել է նաև, որ Ադրբեջանը ոչնչացրել է հայկական պատմական եկեղեցիներն ու վանքերը Իրաքում և Սիրիայում «Իսլամական պետության» գործողությունների մասշտաբներից ավելի մեծ չափով: Հեղինակները դա անվանել են տարածաշրջանում քրիստոնյաների գրեթե 2000-ամյա ներկայության ոչնչացման արշավի մաս:
«Ադրբեջանի արշավը տարածվում է ողջերի բանտարկությունից մինչև ամենասուրբ ժառանգության ոչնչացում»,- ասվում է նամակում:
Նամակն ստորագրողների թվում են նաև Հյուսիսային Ամերիկայի Հայ եկեղեցու արևելյան թեմի առաջնորդ Մեսրոպ եպիսկոպոս Պարսամյանը, Մելքիտե կաթոլիկ եկեղեցուց Ֆրանսուա եպիսկոպոս Բեյրութին, Հակասեմականության դեմ կաթոլիկների կոալիցիայից Սիմոն Ռիզկալլան և այլք:
Կաթոլիկ և հայ կրոնական առաջնորդները վկայակոչել են Հռոմի պապի նախորդ հայտարարությունն այն մասին, որ հայերը «քարի վրա խաչ են փորագրում՝ ի նշան իրենց հաստատուն և անսասան հավատքի»։
Պաշտոնական տվյալների համաձայն՝ Ադրբեջանում պահվում է 23 հայ գերի։ Բաքվում դատախազությունը նոյեմբերի 13-ին ցմահ կամ երկարատև ազատազրկում էր պահանջել հայ գերիների համար։
Հուլիսի 30-ին ԿԽՄԿ-ի Հայաստանի պատվիրակության հաղորդակցության և կանխարգելման ծրագրի ղեկավար Զառա Ամատունին Armenia Today-ին հայտնել էր, որ ԿԽՄԿ-ն չի կարողանում այցելել Ադրբեջանում պահվող հայ գերիներին։ Նրա խոսքով՝ վերջին այցը գերիներին հունիսին էր։ Սեպտեմբերի 2-ին Կարմիր խաչի միջազգային կոմիտեն հայտարարել էր Ադրբեջանում իր գրասենյակը փակելու մասին։ Արցախի Ազգային ժողովի պատգամավոր Մետաքսա Հակոբյանը նոյեմբերի 26-ին ահազանգել էր, որ հայ գերիները և նրանց հարազատները ծանր իրավիճակում են հայտնվել ԿԽՄԿ-ի՝ Ադրբեջանում գործունեության դադարեցումից հետո:
