Անձը հաստատող փաստաթուղթ ստանալու վերաբերյալ դիմումները՝ թե՛ անձնագիր, թե՛ նույնականացման քարտ, տրվելու են հանրապետության 23 գրասենյակներում, որոնք կներդնի մասնավոր ընկերությունը, մամուլի ասուլիսի ժամանակ ասել է ՀՀ ՆԳՆ միգրացիայի և քաղաքացիության ծառայության պետ Նելլի Դավթյանը։
Նրա խոսքով՝ գրասենյակներից 2-3-ը կլինի Երևանում, մյուսները՝ մարզերում։
Ըստ Դավթյանի՝ հանրությունը մտահոգություններ ունի, թե փոքր թվաքանակով գրասենյակները որքանով կկարողանան ժամանակին ու պատշաճ սպասարկել քաղաքացիներին, սակայն թվային գրանցումը կհեշտացնի խնդիրը։
«Գրասենյակներում ներդնելու ենք «բոլորը՝ մեկում» կոչվող տեխնիկական լուծումը, երբ մեկ սարքով և՛ լուսանկարահանումը, և՛ մատնահետք վերցնելը իրականացվելու է տեղում»,- պարզաբանել է Դավթյանը։ Բացի այդ՝ գործելու է նաև առաքման ծառայություն, հետևաբար գրասենյակ գնալու անհրաժեշտություն գրեթե չի առաջանալու։
Մասնավորի կողմից ներդրված գրասենյակներին զուգահեռ Միգրացիայի և քաղաքացիության ծառայության գրասենյակները պահպանվելու են, սակայն կրկին զգալիորեն կրճատված տարբերակով՝ բոլոր մարզերում։
Ըստ Դավթյանի՝ կենսաչափական համակարգի ներդրմամբ ոչ միայն փաստաթղթի որակն է զգալիորեն բարելավվելու, այլև այս ծրագիրը բերելու է նաև արժանապատիվ ճամփորդելու երաշխիք կենսաչափական փաստաթուղթ կրող անձի համար։ Նրա խոսքով՝ աշխարհում գործարկվում են սահմանների կառավարման նոր մոդելներ, ինչը ենթադրում է, որ կենսաչափական անձնագրի առկայությամբ քաղաքացիներին սպասարկելու գործընթացը բավական արագ կկազմակերպվի՝ հնարավորինս նվազագույնի հասցնելով սահմանին անձին պատճառվող անհարմարությունները։
Մանրամասն՝ տեսանյութում։
