Պրոդյուսեր, ռեժիսոր, «Արմենիա» հեռուստաընկերության նախկին գլխավոր պրոդյուսեր Ռուբեն Մխիթարյանը որոշել է առաջադրվել որպես Գյումրու քաղաքապետի թեկնածու։
Նա մանրամասնել է, որ ընտրություններին մասնակցելու է «Իմ հզոր համայնք» կուսակցության միջոցով և պատրաստակամություն է հայտնել համագործակցել այն թեկնածուների հետ, ովքեր կողմ են օրվա իշխանությունների տապալմանը։
«Գյումրիի ու Հայաստանի գլխավոր խնդիրը երևույթ է, որի անունը նիկոլիզմ է և անձ է, որն ապրում է Երևանի կառավարական ամառանոցներից մեկում։ Հենց այդ գիտակցումն է, որ ինձ ստիպել է կայացնել իմ կյանքի հերթական շրջադարձային որոշումը։ Դիրքորոշումս շատ հստակ է՝ Գյումրի քաղաքի ընտրություններում օրվա իշխանությունները հաջողություն չպետք է գրանցեն, և այդ արդյունքին հասնելու համար պատրաստ եմ համագործակցել նման հստակ դիրքորոշում ունեցող մյուս բոլոր թեկնածուների հետ։ Ինձ համար ընտրությունների դրական արդյունք համարելու եմ օրվա իշխանությունների տապալումը, թե ո՞ր դեմքի կամ ո՞ր դեմքերի միջոցով է դա տեղի ունենալու, իմ համար ընդհանրապես էական չէ»,- ասել է Մխիթարյանը։
Նրա խոսքով՝ Գյումրու քաղաքապետի աթոռն իր համար ինքնանպատակ կամ կյանքի իմաստ չէ, պարզապես ուզում է իրական այլընտրանքի հնարավորություն տալ։
«Գյումրիի զարգացման մեր ծրագիրը լինելու է ամենապայծառն ու ամենաիրատեսականը, որովհետև արդեն փոքր մոդելի վրա՝ պրակտիկ դաշտում, ունի գրանցած հաջողություններ»,- շեշտել է նա։
Գյումրիի քաղաքապետ Վարդգես Սամսոնյանը հոկտեմբերի 28-ին հրաժարական էր տվել։ Միաժամանակ՝ հրաժարական էին տվել նաև «Բալասանյան» դաշինքի ավագանու անդամները։
Նոյեմբերի 26-ին վարչապետ Նիկոլ Փաշինյանը հայտարարել էր Գյումրիի քաղաքապետի պաշտոնակատարի թեկնածուին որոշելու համար նախնական ընտրություն անցկացնելու մասին։ Դեկտեմբերի 13-ին Փաշինյանը Սարիկ Մինասյանին Գյումրիի ղեկավարի պաշտոնակատար էր նշանակել։
Մանրամասները՝ տեսանյութում։
