Հայաստանի Հանրապետության կողմից վարվող բալանսավորված և բալանսավորման արտաքին քաղաքականությունը հասնում է իր առաջնային հանգրվանին, Facebook-ի իր էջում հայտարարել է Հայաստանի վարչապետ Նիկոլ Փաշինյանը։
Նա մեկնաբանել է նաև Բաքվի հետ հարաբերությունները և բացառել էսկալացիան։
«Ադրբեջանի հետ հարաբերություններում առկա բոլոր հարցերին Հայաստանն առաջարկել է կառուցողական լուծումներ: Այս համատեքստում տարածաշրջանում էսկալացիաներ հրահրելու բոլոր ջանքերը զուրկ են լեգիտիմությունից և հիմքից, ինչը նշանակում է, որ տարածաշրջանն էսկալացնել չի հաջողվի»,- գրել է Փաշինյանը։
Նրա խոսքով՝ Երևանն Անկարայի հետ «փոխըմբռնման տեսանելի բազա» է ձևավորել, Թեհրանի հետ հարաբերությունները դարձել են «ավելի առարկայական», իսկ Թբիլիսիի հետ «ռազմավարական գործընկերության ուղեծրում» են: Փաշինյանը նշել է, որ Ռուսաստանի հետ Հայաստանի հարաբերություններն «առավել պրակտիկ են, քան երբևէ» և ՀՀ-ի առանցքում «կոնկրետ հարցեր են՝ առանց էմոցիոնալ փաթեթավորման»։
Փաշինյանը հավելել է, որ Հայաստանն ԱՄՆ-ի հետ ռազմավարական գործընկերություն է մեկնարկել, Չինաստանի հետ հարաբերությունները խորացել են, իսկ Հնդկաստանի հետ նոր կշիռ ու իմաստ են ձեռք բերել: Նա ընդգծել է, որ Մերձավոր Արևելքում գործընկերության նոր հնարավորություններ են ստեղծվել: Փաշինյանի խոսքով՝ Ֆրանսիայի հետ բարեկամությունն ամրապնդվել է, իսկ Եվրամիության հետ հարաբերությունները դարձել են «ավելի սերտ, քան երբևէ»։
Վարչապետը կարծում է, որ այս դիրքավորումը Հայաստանի անկախության, ինքնիշխանության և պետականության հարատևության օրակարգը հաջողությամբ սպասարկելու ամուր նախադրյալներ է ստեղծում, ինչը կիրագործվի բալանսավորման ու բալանսավորված արտաքին քաղաքականության առաջիկա փուլերում:
Ադրբեջանի նախագահ Իլհամ Ալիևը հունվարի 7-ին հայտարարել էր, որ «անկախ հայկական պետությունը ֆաշիստական է»։ Փաշինյանը հունվարի 8-ին պատասխանել էր նրան և հայտարարել, որ Երևանը շարունակելու է հավատարիմ մնալ խաղաղ ռազմավարությանը:
