Վերջին 5 ամսվա ընթացքում համացանցում պարբերաբար հայտնվում են գաղտնալսված ձայնագրություններ և տեսանկարահանումներ՝ հիմնականում եկեղեցականների և ընդդիմադիր գործիչների մասնակցությամբ, որոնց հիման վրա իրավապահները քրեական վարույթներ են հարուցում:
Նմանատիպ գաղտնալսումների արդյունքում ձերբակալվել են Բագրատ արքեպիսկոպոս Գալստանյանը, Միքայել արքեպիսկոպոս Աջապահյանը։ Գաղտնալսվել են նաև Նաթան արքեպիսկոպոս Հովհաննիսյանն ու Ամենայն Հայոց կաթողիկոս Գարեգին Երկրորդի նախկին գավազանակիր Աղան աբեղա Երնջակյանը, ինչը ևս դարձել է քրեական վարույթի հիմք։
Գաղտնալսումների արդյունքում ձարբակալվել, ապա նաև կալանավորվել էր Գյումրու քաղաքապետ Վարդան Ղուկասյանը։
Իրավապաշտպաններ Լուսինե Մարտիրոսյանի և Արմեն Ֆերոյանի խոսքով՝ իրավապահ մարմինները մինչ օրս չեն պարզել, թե ո՞վ է կազմակերպել և իրականացրել հանրային մեծ հնչեղություն ստացած ապօրինի գաղտնալսումները։ Ֆերոյանը նշել է, որ նման գործերի չբացահայտված մնալը վտանգավոր նախադեպ է, որը վնասում է պետական համակարգի նկատմամբ քաղաքացիների վստահությանը, և անհրաժեշտ են հստակ իրավական մեխանիզմներ, որպեսզի ապօրինի գաղտնալսումները չդառնան քաղաքական գործիք։
Armenia Today-ը քաղաքացիներից հետաքրքրվել է՝ ինչպե՞ս են վերաբերվում գաղտնալսումներին և գաղտնի արված տեսանյութերի հրապարակմանը։
Հարցված մասնակիցների մեծամասնությունը պատասխանել է, որ դեմ է գաղտնալսումներին ու գաղտնի արված տեսանյութերի հրապարակմանը: Նրանք մտավախություն ունեն, որ մի օր էլ կարող է իրենք թիրախավորվեն։
«Սիրուն չէ, մեր հայ ազգին չի սազում։ Իշխանությունն աննորմալ է»,- ասել է քաղաքացին։
Հարցման մեկ այլ մասնակցի կարծիքով՝ նմանատիպ դրսևորումներով խախտում են բոլոր «կարմիր գծերը»:
«Մարդու անձնական կյանքն իր սահմանն է, այդտեղ մխրճվելը անհարիր է»,- նշել է քաղաքացին:
Քաղաքացիներից մի քանիսն էլ ասել են, որ նմանօրինակ դեպքերը հանրայնացնելու նպատակն «ինչ-որ իրադարձություններն ապացուցելն է»։
«Լինում են դեպքեր, որ չեն հավատում, և ապացույցներ են պետք»,- նշել է քաղաքացիներից մեկը։
Գաղտնալսումներն աջակցող քաղաքացիները հավելել են, որ դա օգնում է նրանց հասկանալ, «թե ի՞նչ է իրականում կատարվում»:
Մանրամասները՝ տեսանյութում։
