«Տաշիր» ընկերությունների խմբի նախագահ Սամվել Կարապետյանի փաստաբանները հայտնել են, որ ավելի քան չորս ժամ տևած նիստից հետո դատարանը հեռացել է խորհրդակցական սենյակ՝ որոշում կայացնելու:
Փաստաբան Արմեն Ֆերոյանի խոսքով՝ միջնորդության վերաբերյալ որոշում կայացնելու հստակ ժամը հայտնի չէ, սակայն, ըստ պաշտպանական կողմի, այն կհրապարակվի առաջիկա 1-2 ժամվա ընթացքում:
Նա տեղեկացրել է, որ դատավորը մանրամասն քննել է նախաքննական միջնորդությունն ու պաշտպանական կողմի փաստարկները:
Պաշտպանական կողմը հայտնել է, որ մեղադրանքի հիմքում Կարապետյանի վերջին հարցազրույցի տեսագրությունն է: Փաստաբանները համոզմունք են հայտնել, որ տեսանյութն իր մեջ հանցագործության տարրեր չի պարունակում:
Փաստաբան Ռուբեն Հակոբյանի գնահատմամբ՝ շատ անհամոզիչ էին դատախազի և քննիչի հիմնավորումները։
«Վիճարկում ենք և՛ ձերբակալման իրավաչափությունը, և՛ հիմնավոր կասկածի առկայությունը։ Գտնում ենք, որ առհասարակ հանցագործություն տեղի չի ունեցել և վիճարկում ենք քննիչի ներկայացրած խափանման միջոցի բոլոր երեք հիմքերը»,- ասել է փաստաբանը։
Հակոբյանն ուշադրություն է հրավիրել այն հանգամանքի վրա, որ նիստին ներկա էին երկու քննիչ և հսկող դատախազ, որը, ըստ նրա, դատավորի նկատմամբ ճնշման միջոց է։
«Որպես կանոն՝ կալանքի միջնորդության քննարկման ժամանակ ներկա է լինում գործը քննող քննիչը, հազվադեպ մասնակցում է նաև հսկողություն իրականացնող դատախազը։ Տվյալ միջնորդության քննարկմանը ներկայացել էին երկու քննիչ և դատախազը, այսինքն՝ ներկայացել էին 3 քննիչով։ Կարելի է ենթադրել, որ ճնշման այսպիսի մեթոդ էր, որ տեսեք՝ երեքով ենք եկել, այսինքն՝ հարգելի դատարան, այս գործը մեզ համար շատ կարևոր է»,- շեշտել է փաստաբանը։
Նա նաև հավելել է, որ նիստը վարելու ընթացքում դատավորի մոտ ճնշվածություն չի նկատել։
Կարապետյանը հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների արշավը, որից հետո Ներքին գործերի նախարարության հատուկ նշանակության ստորաբաժանումները խուզարկություններ էին սկսել «Տաշիր» ընկերությունների խմբի նախագահի տանը՝ Երևանում։
ՆԳՆ-ից Armenia Today-ին մեկնաբանել էին, որ Կարապետյանի առանձնատան մոտ «մի խումբ անձինք բերման են ենթարկվել, իրականացվում են օպերատիվ գործողություններ»։ Գործարարի եղբայրը՝ նախկին պատգամավոր Կարեն Կարապետյանը, հայտնել էր, որ ավելի քան 45 անձ է բերման ենթարկվել, այդ թվում՝ ձեռքի կոտրվածքներով։ Կարապետյանի առանձնատան մոտ հարյուրավոր քաղաքացիներ էին հավաքվել՝ աջակցություն հայտնելու նրան։
Հունիսի 18-ի գիշերը «Տաշիր» ընկերությունների խմբի նախագահին իր տնից բերման էին ենթարկել ՆԳՆ ոստիկանության քրեական ոստիկանության գլխավոր վարչություն։
«Ես մեր եկեղեցու, մեր ժողովրդի կողքին եմ, ինչքան էլ փորձեն սևացնել։ Թքած ունեմ ցանկացած ՀԷՑ-երի վրա, ամեն ինչ լավ է լինելու։ Ժողովուրդն իր խոսքը կասի, իրենք հասկանալու են: Չմոռանաք, բոլորին դաս կտանք»,- նախքան ոստիկանություն տեղափոխվելը՝ իր տան մոտ հայտարարել էր Կարապետյանը:
Ավելի ուշ ՔԿ-ն Armenia Today-ին հայտնել էր իշխանությունը զավթելու կոչեր անելու մեղադրանքով Կարապետյանին կալանավորելու միջնորդության մասին։ Ինքը՝ գործարարը, չի ընդունում մեղադրանքը և մտադիր է բողոքարկել այն բոլոր ատյաններում։ Կարապետյանի մամուլի ծառայությունն այս մեղադրանքներն անվանել էր ակնհայտ վախեցնելու և բռնաճշման փորձ։
Մանրամասները՝ տեսանյութում։
