Դատախազությունը դատարան է հանձնել Սուրբ Աթոռում ՀՀ նախկին դեսպան Միքայել Մինասյանի կողմից ստեղծված հանցավոր կազմակերպությանը մասնակցելու, փողերի լվացում կատարելու, իրավաբանական անձ ստեղծելու և այն օգտագործելու միջոցով ապօրինի գործունեություն իրականացնելու մեջ մեղադրվող Վ.Ս.-ի և Ա.Պ.-ի վերաբերյալ վարույթը, Armenia Today-ին հայտնեցին Գլխավոր դատախազության մամուլի ծառայությունից։
Գլխավոր դատախազությունից պարզաբանեցին, որ այս գործով ՀՀ-ին 1 միլիարդ 504 միլիոն 382 հազար դրամի վնաս է պատճառվել։
Ըստ դատախազության տարածած հայտարարության՝ վարույթով հաստատվել է, որ Մինասյանը Լ.Ա.-ի Ա.Պ.-ի, Ա.Հ.-ի և Վ.Ս.-ի հետ, «Շին Տավր» ՍՊ ընկերության բաժնեմասերը ձեռք բերելու նպատակով, 2013 և 2014 թվականներին կնքել է ձևական վարկային պայմանագրեր: Կազմակերպություններից մեկի բանկային հաշվից ընդհանուր՝ 3 միլիոն 700 հազար եվրո փոխանցվել է մյուս կազմակերպության բանկային հաշվին:
Դրանից 3 միլիոն 620 հազար եվրոն փոխանցվել է MLRE LTD ընկերության հաշվին, իսկ Մինասյանին փաստացի պատկանող ոչ ռեզիդենտ մեկ այլ կազմակերպության հաշվից 1 միլիոն 250 հազար դոլարից 1 միլիոն դոլարը նույն օրը մուտքագրվել է MLRE LTD ընկերության հաշվին, ասված է հայտարարության մեջ։
Ըստ հրապարակման՝ ոչ ռեզիդենտ մեկ այլ կազմակերպությունից նույն ընկերության հաշվին փոխանցվել է ընդհանուր 3 միլիոն 50 հազար եվրո, ապա մեկ այլ կազմակերպությունից՝ 1 միլիոն 764 հազար 965 դոլար: Փոխանցված գումարները միախառնվել են այլ գումարներին, որից հետո «Շին Տավր» ՍՊ ընկերության հաշվին փոխանցվել է 3 միլիարդ 124 միլիոն 800 հազար դրամ՝ «կանոնադրական կապիտալի ներդրում» նպատակով:
MLRE LTD ընկերությունը դարձել է «Շին Տավր» ՍՊ ընկերության բաժնետեր՝ 30 տոկոսի չափով: Միաժամանակ, ընկերության ժողովի ընթացքում Վ.Ս.-ն նշանակվել է ընկերության տնօրեն:
Գործարքներին օրինական տեսք հաղորդելու նպատակով՝ ընկերությունը և Վ.Ս.-ն կնքել են բաժնեմասի առուվաճառքի ձևական պայմանագիր: «Երևան Մոլ» ՍՊ ընկերության կանոնադրական կապիտալի 30 տոկոսը կազմող 30 բաժնեմասն իբրև 3 միլիարդ 200 միլիոն դրամով ամբողջությամբ վաճառել է Վ.Ս.-ին՝ օրինականացնելով հանցավոր ճանապարհով ստացված՝ առանձնապես խոշոր չափերով գումարները:
Նախաքննությամբ հիմնավորվել է, որ Մինասյանն օգտագործել է Սուրբ Աթոռում Հայաստանի արտակարգ և լիազոր դեսպան, Մալթայի Մարտական Ինքնիշխան Ուխտում Հայաստանի դեսպան, ՀՀ նախագահի ընտանիքի անդամ լինելու գործոնը: Արդյունքում՝ ոչ ռեզիդենտ կազմակերպության հայաստանյան հաշիվը համալրվել է 6 միլիարդ 103 միլիոն 104 հազար դրամով, 12 միլիոն 795 հազար դոլարով, 952 միլիոն 281 հազար ռուբլիով և 1700 եվրոյով:
Վերը նշված գումարները նույն ժամանակահատվածում գրեթե ամբողջությամբ կանխիկացվել են Մինասյանի հետ փոխկապակցված անձանց կողմից, դրանց մի մասը մի շարք անձանց՝ այդ թվում Ա.Պ-ի կողմից կանխիկ մուտքագրվել և միախառնվել է նրա հետ փոխկապակցված մի շարք ռեզիդենտ և ոչ ռեզիդենտ կազմակերպությունների ֆինանսական միջոցներին:
Այնուհետև ընկերություններից մեկը՝ ի դեմս հիմնադիր և տնօրեն Բ.Ս.-ի, գլխավոր հաշվապահ Ա.Մ.-ի, ստացված միջոցները միախառնելով այդ ընկերության հաշվին ստացված՝ դրա օրինական գործունեությամբ չհիմնավորվող և հանցավոր ծագում ունեցող մյուս գումարների հետ, 11 միլիարդ 154 միլիոն 994 հազար ՀՀ դրամ ներդրել է «Վելոֆիրմա» ՍՊ ընկերությունում (Double Tree by Hilton հյուրանոց)՝ վերջնարդյունքում օրինականացնելով հանցավոր ծագում ունեցող առանձնապես խոշոր չափերով գումարները:
