Առողջապահության նախարար Անահիտ Ավանեսյանը օրերս ներկայացել է Հակակոռուպցիոն դատարան և ցուցմունք տվել «Քովիդ-19-ի գործով» քննվող քրեական վարույթի շրջանակում, գրել է «Ժողովուրդ» օրաթերթը։
Ըստ թերթի աղբյուրների՝ նախարարը դատարանից երկու անգամ ծանուցում է ստացել, սակայն զբաղվածության պատճառով չի ներկայացել։ Ի վերջո, օրերս Ավանեսյանը ներկայացել և ցուցմունք է տվել։ Ցուցմունքների բովանդակությունը և գործով հնարավոր զարգացումները պաշտոնապես չեն հաղորդվում։
ԶԼՄ-ի տեղեկություններով՝ առաջիկայում նույն գործով նախատեսվում է նաև համավարակի տարիներին Առողջապահության նախարարի պաշտոնն զբաղեցրած Արսեն Թորոսյանի հարցաքննությունը։
Քրեական վարույթը վերաբերում է 2020-2022 թվականներին կորոնավիրուսի համավարակի ընթացքում պետական միջոցների հնարավոր յուրացմանը և պաշտոնեական լիազորությունների չարաշահմանը։
Քրեական վարույթի շրջանակներում նախկինում ձերբակալվել էին Երևանի փոխքաղաքապետ, նախկին փոխնախարար Գևորգ Սիմոնյանը, ԲԿ տնօրեն Բաբկեն Շահումյանը և ևս ութ անձ։ 2024 թվականի ապրիլին ՀՀ գլխավոր դատախազությունը մեղադրական եզրակացությունը հաստատել և ուղարկել էր Հակակոռուպցիոն դատարան։
