Էլեկտրաէներգիայի սակագները շարունակում են մնալ իշխանությունների և ընդդիմության քննարկումների օրակարգում։ Ուղիղ երեք ամիս է, ինչ «Հայաստանի էլեկտրական ցանցեր» ընկերությունը զրկված է լիցենզիայից: Այն պետականացնելու մասին վարչապետ Նիկոլ Փաշինյանը հայտարարել էր Հայ Առաքելական եկեղեցուն աջակցելու մասին ՀԷՑ սեփականատեր, «Տաշիր» ընկերությունների խմբի նախագահ Սամվել Կարապետյանի հայտարարությունից ժամեր անց:
Մինչև ընկերության պետականացման գործընթաց սկսելը՝ մերժելով Կարապետյանի՝ սակագների նվազեցման առաջարկը, Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը փետրվարին պնդել էր, որ ՀԷՑ-ի ժամանակավոր կառավարիչ նշանակելուց հետո 3000-5000 դրամով նվազել է հոսանքի դիմաց քաղաքացիների ամսական վճարումը։
Մեսրոպյանը դա բացատրել էր պետության կողմից նշանակված ժամանակավոր կառավարչի արդյունավետ գործունեությամբ, մինչդեռ Հայաստանը միջազգային արբիտրաժային դատարանում դատական գործընթացի մեջ է ընկերության սեփականատիրոջ հետ։
ՀԷՑ տնօրենի նախկին պաշտոնակատար Դավիթ Ղազինյանը համամիտ չէ այս տեսակետի հետ։ Նրա տվյալներով՝ մատուցվող ծառայությունների որակի վերաբերյալ բողոքների աճ է գրանցվել, երբ նոր ղեկավարությունը նրան ստիպել է հեռանալ ընկերությունից։ Զարմացած է կարգավորող մարմնի ղեկավարի հայտարարությունից, որը, լինելով անկախ մարմին, պաշտպանում է իշխանության տեսակետը և վստահեցնում, թե սպառողներն անձամբ շնորհակալություն են հայտնում իրեն։
Ղազինյանը նաև կասկածի տակ է դրել ՀԷՑ ժամանակավոր ղեկավարության և հանձնաժողովի նախագահի հայտարարությունները հավելագրումների վերաբերյալ։ Հիշեցնում է՝ անկախ հանձնաժողովի նախագահն ունի բոլոր վերահսկողական գործառույթները և հավելագրումներ հայտնաբերելու դեպքում պետք է դիմի ՀՀ գլխավոր դատախազություն։
«Մեր ձևով» շարժումը դեկտեմբերի սկզբին հայտարարել էր հոսանքի սակագնի նվազեցման համապետական ստորագրահավաքի մեկնարկի մասին՝ պնդելով, որ սակագինը կարող է նվազել 3 դրամով՝ դրական հաշվեկշռի շնորհիվ։ Ավելի վաղ ՀԷՑ-ի տնօրենների խորհրդի նախագահ Նարեկ Կարապետյանը հայտարարել էր, որ ՀԾԿՀ-ն մերժել էր սակագինն իջեցնելու առաջարկը։ «Տաշիր կապիտալը» սակագինն իջեցնելու առաջարկով երկրորդ անգամ էր դիմել հանձնաժողովին:
Ղազինյանն այսօր արդեն այլ մտահոգություն ունի, եթե մինչ այժմ հոսանքի համար քաղաքացին ավելի էր վճարում հնարավոր հավելագրումների պատճառով, ապա ընտրություններից հետո կբարձրանա հոսանքի սակագինը։
Չնայած պաշտոնական հավաստիացումներին և փորձագիտական զգուշացումներին՝ Armenia Today-ի հարցումները ցույց են տալիս, որ սպառողները դեռ չեն զգում ծախսերի նվազում։
Քաղաքացիների համար առաջնային է մնում մեկ հարց՝ արդյոք հաշվիչների ցուցմունքները համապատասխանո՞ւմ են իրական սպառմանը և ինչպիսի՞ն կլինի սակագինը քաղաքական վերադասավորումներից հետո։
Մանրամասն՝ տեսանյութում:
