«Մեր ձևով» ժողովրդական շարժման համակարգող Նարեկ Կարապետյանը «Շանթ» հեռուստաընկերության եթերում ներկայացրել է մանրամասն հաշվարկներ ու ծրագրեր՝ կապված երկրի տնտեսական զարգացման ու սոցիալական բևեռվածության հետ:
Ըստ Կարապետյանի՝ երկրի արդյունավետ զարգացման և սոցիալական ծախսերի ապահովման համար անհրաժեշտ է 800 հազար գրանցված աշխատողների թիվն ավելացնել ևս 300 հազարով՝ ստեղծելով նոր աշխատատեղեր:
«Դա պիտի լինի մեր երկրի առաջին նպատակը, որպեսզի 1,1 մլն մարդ աշխատելով կարողանա 500 հազար մարդու թոշակ տալ և ապահովել աշակերտների լավ ուսումը»,- նշել է նա:
Կարապետյանը մատնանշել է հետևյալ պատկերը. 3 մլն բնակչությամբ Հայաստանում գրանցված է 800 հազար աշխատող (հաշվի առնելով, որ մեկ անձը կարող է մի քանի աշխատավայրում գրանցված լինել), կա 200-300 հազար պետական աշխատակից, 500 հազար թոշակառու, 300-500 հազար աշակերտ ու ուսանող:
Ըստ նրա՝ երկրում կա մոտ 1,8 մլն մարդ, ովքեր կա՛մ աշխատում են, կա՛մ չեն կարող աշխատել (թոշակառուներ, ուսանողներ), և մոտ 1,2 մլն մարդ, ովքեր պատրաստ են աշխատաշուկային, սակայն չունեն կայուն աշխատանք:
«Այս խումբն ընդգրկում է տնային տնտեսուհիներին ու գյուղաբնակներին, ովքեր զբաղվում են գյուղատնտեսությամբ, բայց գյուղնախարարության թուլության պատճառով չունեն կայուն եկամուտ։ Մեր երկիրը՝ մեր գյուղերը, մեր քաղաքները, աշխատատեղեր չեն կարողանալու ստեղծել, եթե սպասեն, որ ինչ-որ ներդրող գա, ներդրում անի»,- նշել է Կարապետյանը։
Շարժման համակարգողն ընդգծել է, որ լուծումը պետության ակտիվ մասնակցությունն է տնտեսական նախագծերին, որպեսզի արագ ձևավորվեն ինչպես արդյունաբերական, այնպես էլ ծառայությունների ոլորտի ձեռնարկություններ, որոնք կխթանեն տնտեսության աճը։
«300 000 աշխատատեղից արդյունաբերության մեջ 80 000 աշխատատեղ ենք նախատեսել, որից 25 000-ը վերամշակող արդյունաբերության մեջ է՝ մետալուրգիա, նավթավերամշակում, տարբեր էլեկտրատեխնիկական արտադրություններ»,- մանրամասնել է նա:
Կարապետյանը հավելել է, որ մեծ պոտենցիալ տեսնում է երկրի համայնքների զարգացման մեջ, ինչը պահանջում է պետական նախաձեռնության և ներդրումների ակտիվացում:
