Կիբեռզեղծարարությունից տուժած քաղաքացիները ՔԿ-ից պահանջել են վերադարձնել կորցրած գումարները՝ որպես հանցագործության մասնակից

Կիբեռզեղծարարությունից տուժած քաղաքացիներն այսօր՝ նոյեմբերի 25-ին, հավաքվել են Քննչական կոմիտեի շենքի մոտ՝ պահանջելով կառույցից հատուցել իրենց դրամական կորուստները։ «Փողս տո՛ւր», «Բացահայտի՛ր, քննի՛չ» գրություններով պաստառներով քաղաքացիները մատնանշել են իրավապահների «անգործությունը», որի հետևանքով իրենք միջոցներ են կորցրել։

Նոյեմբերի 19-ին քաղաքացիները հանցագործության մասին հաղորդում էին ներկայացրել Գլխավոր դատախազություն՝ պահանջելով քրեական գործ հարուցել իրենց դրամական կորուստների վերաբերյալ։

«Հանրային վերահսկողություն» ՀԿ ղեկավար, իրավապաշտպան Մհեր Կարագյոզյանը նշել է, որ այս անգամ եկել են քաղաքացիների գումարների հետևից, քանի որ իրավապահները ներգրավված են հանցագործության մեջ։ Նրա խոսքով՝ իրավապահները տեղյակ էին, որ Հայաստանում ապօրինի ձեռնարկատիրություններ են գործում, սակայն չեն կանխել դրանց գործունեությունը՝ այսպիսով նպաստելով խաբեություններին։

«Եկել ենք պահանջելու քաղաքացիներից շորթված գումարները, որովհետև այդ հանցագործությունները տեղի են ունեցել տվյալ պետական մարմինների թերի աշխատանքի արդյունքում։ Դրա հետևանքով երկրում ունենք մոտավորապես 20 000 և ավելի տուժած, խոսքը զանգերի կենտրոնների միջոցով ներդրումային խարդախությունների և այլ կիբեռհանցագործությունների մասին է, որ այսօր քաղաքացիները հայտնվել են ֆինանսական կազուսի առաջ»,- պարզաբանել է նա։

Կարագյոզյանի խոսքով՝ քաղաքացիները մեծ գումարներ կորցնելուց հետո ենթարկվում են հալածանքների և այդ պատճառով խուսափում են լրատվամիջոցներից։

«Ո՞ւր էր ձեր գլուխը, ինչի՞ եք խաբվել, գումարները փոխանցել հանցագործներին․ նախ՝ հանցագործների ճակատին գրված չէր, որ իրենք հանցագործ են, նմանատիպ դեպքերում ամբողջ փաստաթղթաբանությունը, իհարկե, ապահովագրված է լինում։ Մենք ունենք շահառուներ, ովքեր մասնագիտությամբ ծրագրավորող են, այստեղ կան քաղաքացիներ, ովքեր աշխատում են բանկերի փողերի լվացման բաժիններում, այնպես որ ծուղակում հայտնվելը միայն ու միայն միամիտ մարդու խնդիրը չէ»,- ընդգծել է նա։

Իրավապաշտպանը նշել է, որ մի քանի փուլով գումարներ փոխանցելը նույնպես ոչ թե միամտության, այլ մեծ ծուղակում հայտնվելու մասին է։

«Ունենք քաղաքացիներ, ովքեր առաջին ներդրումն արել են 1400 դոլար, դրանից հետո արել են նորից մոտ 1000 դոլար, հետո ինչ-որ միջազգային իբրև թե կազմակերպություններ զանգահարում են քաղաքացիներին, իբրև թե իրավաբանական ծառայություններ են, և այդ կորցրած գումարը գտել են, բայց մնում է՝ իրենց վճարեն, որ այդ գումարները վերադարձնեն, մի քանի հազար դոլար էլ վերցնում են այսպես կոչված իրավաբանները՝ հետո իբրև թե շահույթի ինչ-որ հարկեր, ինչ-որ տոկոսներ»,- հստակեցրել է նա։

Կարագյոզյանի խոսքով, սակայն, քրեական գործի նախաձեռնումից հետո քաղաքացին դեռևս ոչ միայն պաշտպանված չէ, այլև հանցագործությունը նույն կերպով և ավելի մեծ թափով շարունակում է նրա նկատմամբ, և որևէ կերպ չի պաշտպանվում։

«Մենք հիշեցնում ենք նրանց պարտականությունները, որը պիտի կատարեն, հակառակ դեպքում՝ այդ դռները կփակենք (ՔԿ շենքի-խմբ․), հակառակ դեպքում՝ պատրաստ չենք կույր աղիքներ պահելու, պատրաստ չենք հարկեր վճարելու այն դեպքում, եթե մեր իրավունքները որևէ դեպքում չեն վերականգնվում, թող նշեն դեպք, երբ ներդրումային խարդախությունների հետևանքով զոհ դարձած քաղաքացիներից մեկի իրավունքը վերականգնվել է»,- շեշտել է իրավապաշտպանը։

Ավելի ուշ քաղաքացիներին է մոտեցել ՀԿԳ քննության գլխավարությամբ կիբեռհանցագործության և բարձր տեխնոլոգիաների ոլորտում կատարված հանցագործության քննության վարչության պետ Շիրազ Գրիգորյանը։ Նա մանրամասնել է քաղաքացիների քրեական գործերի ընթացքը և խոստացել ընդունել հավաքված քաղաքացիներից 5-ին՝ իրենց ընտրությամբ։

Գրիգորյանը, հակադարձելով Կարագյոզյանի այն պնդմանը, թե քաղաքացիների իրավունքները չեն պաշտպանվում, ասել է, որ կիբեռհանցագործության քննության վարչության քննիչները ձեռնարկում են բոլոր միջոցները տուժողների խախտված իրավունքների վերականգնման համար։

«Տուժողների կողմից հասցեագրված բոլոր դիմումներն ստանում են իրենց պատասխանները, քաղաքացիներն ստանում են ընդունելություն, անհրաժեշտության դեպքում՝ նաև իրենց հայտնի նոր հանգամանքների վերաբերյալ, վարույթ իրականացնող մարմինը հայտնում է նոր տեղեկություններ, որի շուրջ էլ վարույթ իրականացնող քննիչը պլանավորում է համապատասխան ապացուցական և այլ վարութային գործողությունների կատարումը»,- նշել է նա։

Գումարի փոխհատուցման մասին քաղաքացիների պահանջին պատասխանելով՝ Գրիգորյանը շեշտել է, որ վարույթ իրականացնող մարմինը պետք է միջոցներ ձեռնարկի տուժած անձանց հանցագործության պատճառված վնասի վերականգնման ուղղությամբ։ Նա նաև հայտարարել է, որ սխալ է պնդումը, որ բացահայտված դեպքեր չկան։ Մի շարք դեպքերում, ըստ նրա, կան նույնիսկ գումարների վերադարձի դեպքեր։

«Վիճակագրական տվյալները ներկայումս չեմ կարող մատնանշել, բայց հաստատապես կարող եմ նշել, որ մի շարք քրեական վարույթներով բացահայտվել են հանցագործության կատարած անձինք, վերջիններիս ներկայացվել է մեղադրանք, այդ թվում՝ նախաքննության կատարման ընթացքում վերականգնվել է հանցագործության տուժած անձանց պատճառված հանցագործության վնասները»,- տեղեկացրել է ՔԿ ներկայացուցիչը։

Կարագյոզյանը նոյեմբերի 19-ին լրագրողներին տեղեկացրել էր, որ իրենց ՀԿ-ն կիբեռզեղծարարության ավելի քան 250 դիմում ունի ՀՀ քաղաքացիներից, որոնցից ավելի քան 70%-ը կապված է HelloBit-ի հետ։ Նրա տվյալներով, ընդհանուր առմամբ, տարբեր հարթակներում կիբեռհանցավորության զոհ է 20 000 ՀՀ քաղաքացի։

ՀՀ ՆԳՆ ոստիկանությունն ավելի վաղ հայտնել էր, որ բացահայտել է այս տարի միջազգային կապեր ունեցող չորրորդ կիբեռհանցագործության «զանգերի կենտրոնը»։ Կառույցը հոկտեմբերի 30-ին զգուշացրել էր անձանց մասին, որոնք 5000 դրամի դիմաց պատրաստ են վաճառել իրենց բջջային հեռախոսահամարով ակտիվացրած հաղորդագրությունների հավելվածները։ ՆԳՆ-ից հորդորել էին քաղաքացիներին զերծ մնալ իրենց բջջային հեռախոսահամարներով կամ ուրիշների համար այլ հեռախոսահամարներով էջեր բացելուց։

Նոյեմբերի 10-ին ՆԳՆ-ն զգուշացրել էր HelloBit(y) ֆինանսական բուրգի սխեմայի ռիսկերի մասին և կոչ արել զերծ մնալ նման ռեսուրսներում «ներդրումներ» կատարելուց։

Կարդացեք նաև՝