Երևանում տեղի է ունեցել «Տաշիր» ընկերությունների խմբի նախագահ, ներկայումս կալանքի տակ գտնվող Սամվել Կարապետյանի նախաձեռնությամբ ստեղծված «Մեր ձևով» շարժման առաջին հաշվետու ժողովը։ Միջոցառման ընթացքում մասնակիցները խոսել են շարժման կողմնակիցների աճող թվից, հայտարարել Երևանում հանրահավաքի մասին և ներկայացրել արդեն իսկ կատարված աշխատանքները։ Հանդիպումն ուղիղ հեռարձակվել է Armenia Today-ի YouTube-յան ալիքով։
Շարժման համախոհների և կամավորների թվի աճ
«Մեր ձևով» ժողովրդական շարժմանը միացել է շուրջ 5000 կամավոր, հաշվետու ժողովում հայտարարել է շարժման համակարգող Նարեկ Կարապետյանը։ Ամերիկահայ տնտեսագետ և Նոբելյան մրցանակի դափնեկիր Տարոն Աճեմօղլուն նույնպես միացել է նախաձեռնությանը որպես փորձագետ և կօգնի Հայաստանի տնտեսական զարգացման ծրագրի մշակմանը։
Կարապետյանը վստահություն է հայտնել, որ շարժման կողմնակիցների թիվն առաջիկա ամիսներին կհասնի տասնյակ հազարների, ինչը կհանգեցնի անդառնալի փոփոխությունների հայ հասարակության մեջ։ Նա նշել է, որ մարդիկ աջակցում են շարժմանը, քանի որ վստահում են նախաձեռնողին՝ «Տաշիր» ընկերությունների խմբի ղեկավարին։
«Չենք նահանջելու». Սամվել Կարապետյանը դիմել է իր կողմնակիցներին
Հանդիպման ընթացքում ընթերցվել է Սամվել Կարապետյանի ուղերձը։ Նա նշել է, որ շարժումը հասել է իր գլխավոր նպատակին՝ պահպանել ժողովրդի հույսը և կանխել հայերի կողմից հայրենիքից հեռանալը։ Գործարարը հավելել է, որ «Մեր ձևովը» դարձել է նշանակալի հասարակական ուժ, որը կարող է ազդել երկրի քաղաքական կյանքի վրա։
Ըստ Կարապետյանի՝ շարժմանը միացել են հազարավոր մարդիկ, և այն շարունակում է աճել՝ դառնալով իսկական համաժողովրդական ուժ։
«Թող որևէ մեկը չկասկածի՝ չենք նահանջելու, կանգ չենք առնելու, ու մեր ժողովրդի հետ միասին Հայաստանը դարձնելու ենք աշխարհի ամենալավ, ամենաբարեկեցիկ ու ամենաերջանիկ երկիրը։ Անելու ենք՝ մեր ձևով»,- հայտարարել է Կարապետյանը։
Ամփոփելով՝ նա հիշեցրել է, որ ավելի քան 110 օր կալանքի տակ է գտնվում՝ իր բանտարկությունը որակելով անօրինական։
Տնտեսական զարգացում և անվտանգություն. Նարեկ Կարապետյանը նշել է առաջնահերթությունները
Շարժման համակարգողն ընդգծել է, որ «Մեր ձևով»-ի առաջնահերթությունների մեջ չի մտնում որևէ հարցի շուրջ Հայաստանի և այլ երկրների միջև հակամարտություն փնտրելը։
«Հայաստանը տարածաշրջանի ամենախաղաղասեր երկիրն է, և իր խաղաղությունը պետք է լինի ապահոված, իսկ մեր անվտանգային համակարգը պետք է լինի մեր ամրագոտին»,- ասել է նա՝ պնդելով, որ հուսալի անվտանգության համակարգը պետք է լինի Հայաստանում խաղաղության երաշխիքն ու հենարանը:
Կարապետյանը պարզաբանել է, որ երբ Հայաստանն իր քաղաքականության շնորհիվ դառնա տնտեսապես զարգացած և հարուստ պետություն, տարածաշրջանում ոչ ոք չի համարձակվի ագրեսիվ գործել, և դաշնակիցներն ավելի մեծ հարգանքով կվերաբերվեն Երևանին: Ահա թե ինչու շարժումը մտադիր է իր քաղաքականությունը կենտրոնացնել տնտեսական զարգացման վրա:
Կարապետյանը նշել է, որ այս ոլորտի զարգացումը կօգնի լուծել բազմաթիվ այլ խնդիրներ, այդ թվում՝ գործազրկության վերացումը և կրթության խթանումը: Նա վերահաստատել է արդյունաբերական զարգացման և գործարանաշինության կարևորությունը՝ պատասխանելով քննադատությանը, որ դրական հղումներ է արել խորհրդային փորձին:
Շարժման համակարգողը հիշեցրել է, որ Արցախի ազատագրման գործընթացը Խորհրդային Միության փլուզման կատալիզատորն էր, և վերադարձը խորհրդային համակարգին անհնար է, քանի որ «21-րդ դարը դինամիկ, ազգային պետությունների դար է, որը մենք պետք է լինենք»:
Կարապետյանը նաև նշել է անկախ Հայաստանի նվաճումները, որը սեփական ջանքերով, առանց զգալի արտաքին օգնության, կարողացել է հաղթել դարավոր թշնամուն և լավ կազմակերպվածության շնորհիվ ազատագրել իր տարածքի 30%-ը: Նա կոչ է արել բոլորին դասեր քաղել 44-օրյա պատերազմից՝ չհանգստանալ հաղթանակներից հետո, այլ մնալ զգոն և զարգանալ բավականաչափ՝ հարևան պետություններից մի քանի քայլ առաջ անցնելու համար։
Նա նաև նշել է, որ շարժման ներկայացուցիչները Հայաստանի մարզերի գյուղեր այցելությունների ժամանակ համոզվել են, որ գյուղերում իշխանությունների նկատմամբ դժգոհությունն աճում է, և որ կա «մեծ հակազդեցություն»։ Կարապետյանն «առասպել» է անվանել այն միտքը, որ գյուղական վայրերում աջակցում են ՀՀ կառավարությանը։
Շարժման անդամ Ռուբեն Մխիթարյանը շեշտել է Հայաստանի մարզերի զարգացման կարևորությունը՝ նշելով, որ դա կապահովի երկրի համաչափ զարգացումը և կնվազեցնի Երևանի բեռը։ Շարժման մյուս մասնակիցները նկարագրել են իրենց աշխատանքային խմբերի շրջանակներում կատարված աշխատանքը և ներկայացրել ապագայի տեսլականը։
Երևանում հանրահավաքի անցկացման ծրագիր
Համակարգող խորհրդի անդամ Ալիկ Ալեքսանյանը նշել է, որ Երևանում կկայանա հանրահավաք՝ ի աջակցություն «Տաշիր» ընկերությունների խմբի նախագահի։ Միջոցառումը նախատեսված է հաջորդ շաբաթ՝ «Ազատության» հրապարակում։ Շարժումը հանրահավաքի ամսաթիվը կհայտարարի ավելի ուշ։
Ալեքսանյանը հայտնել, որ շարժումը մշակել է Հայ Առաքելական եկեղեցու իրավական և քաղաքական հիմքերի ապահովմանն ուղղված հայեցակարգ։ Նա հիշեցրել է, որ Կարապետյանը 114 օր կալանքի տակ է եկեղեցու կողմը կանգնելու համար։
«Մեր բոլորի բռնած ճանապարհը հաղթանակի ճանապարհ է, մեր անցնելիք ճանապարհը, գաղափարները դառնալու են աշխատանք, մեր խոսքը վերածվելու է գործի»,- ընդգծել է նա։
Շարժման վարչապետի թեկնածուն և ՔՊ-ի քաղաքական մենաշնորհի ավարտը մարզերում
Նարեկ Կարապետյանը հանդիպումից հետո տեղի ունեցած մամուլի ասուլիսում հայտարարել է, որ «Մեր ձևով» ժողովրդական շարժման վարչապետի թեկնածուն ընդունելի կլինի, և «բոլորը կհավանեն նրա թեկնածությունը»։ Armenia Today-ի հարցին ի պատասխան՝ նա նշել է, որ «Քաղաքացիական պայմանագիր» կուսակցության յոթամյա քաղաքական մենաշնորհը Հայաստանի մարզերում մոտենում է ավարտին:
«Մարզերում բավական հետաքրքիր բանի առերեսվեցինք, որ շատ են իշխանությանը չաջակցող մարդիկ՝ ընդդիմադիր մարդիկ, այդ պատճառով մենք տեսնում ենք, որ անգամ մարզերում այն մոնոպոլիան, որ ուներ «Քաղաքացիական պայմանագիր» կուսակցությունը վերջին 7 տարվա ընթացքում, մոտենում է ավարտին, քանի որ ժողովուրդը հասկացել է՝ նրանք զբաղվում են միայն քոմենթ գրելով և ասֆալտ անելով: Ինձ թվում է՝ նրանք ավելի երկարաժամկետ որևէ ծրագիր դեռ չեն ներկայացրել մարզերի մեր բանկիչներին»,- ասել է Կարապետյանը:
Մեկնաբանելով Armenia Today-ի մյուս հարցը, թե ի՞նչ խնդիրներ կան մարզերում, շարժման համակարգող խորհրդի անդամը նշել է, որ, օրինակ, Արարատի մարզում՝ Արարատյան դաշտավայրում, հիմնական խնդիրը բերքի մթերման հարցն է:
«ՔՊ-ի կառավարման ժամանակ գյուղատնտեսությունն իրական արժեքով անկում է ապրել 10%-ով, բայց մենք պետական բյուջեից հարյուրավոր միլիոններ տվել ենք գյուղատնտեսությանը: Սա նշանակում է, որ բռնել ենք սխալ ճանապարհ, և պետք է հիմնական ֆինանսավորումը կատարենք մթերման կայաններին, որպեսզի Արարատյան դաշտում մթերման հարցը լուծվի: Մնացած մարզերում, որտեղ չկա հանքարդյունաբերություն, կա մեծ գործազրկություն»,- շեշտել է նա:
Կարապետյանը նաև հայտնել է, որ շարժմանը միացել է ևս 5000 մարդ: Իսկ աճն, ըստ նրա, ամենօրյա է:
«Ամեն մարզային այցից հետո ունենք մի քիչ ավելի դինամիկ աճ առաջին երկու-երեք օրը, որովհետև մարդիկ ծանոթանում են ու գալիս»,- ասել նա:
Հունիսին Սամվել Կարապետյանին կալանավորել էին եկեղեցու դեմ իշխանությունների արշավը քննադատելուց հետո: Օգոստոսին նա հայտարարել էր «Մեր ձևով» ժողովրդական շարժման ստեղծման մասին, որն սկզբում կլինի ապաքաղաքական, այնուհետ քաղաքական հայտ կներկայացնի։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
«Իրավական ամենաթողություն է»․ Սամվել Կարապետյանի փաստաբանները կբողոքարկեն կալանքը երկարաձգելու որոշումը
«Լսել մարդկանց և կիսել գաղափարները»․ կայացավ Սամվել Կարապետյանի «Մեր ձևով» շարժման շնորհանդեսը
