ԱՄՆ պետքարտուղար Մարկո Ռուբիոն հայտարարել է, որ ՄԱԿ-ի Անվտանգության խորհուրդն Իրանի դեմ պատժամիջոցները վերականգնել է «Եվրոեռյակի» (Մեծ Բրիտանիա, Ֆրանսիա և Գերմանիա) կողմից գործարկված պատժամիջոցների վերականգնման մեխանիզմի շրջանակներում, հայտնել են Պետդեպից։
Ռուբիոյի խոսքով՝ պատժամիջոցները կրկին ուժի մեջ են դրվել, քանի որ Իրանն «էականորեն չի կատարել» 2015-ի միջուկային համաձայնագրով ստանձնած պարտավորությունները։ Նա հավելել է, որ պատժամիջոցները վերականագնվել են ԱԽ-ի նախկին վեց բանաձևերի հիման վրա։
Պատժամիջոցները, մասնավորապես, նախատեսում են ուրանի հարստացման, ծանր ջրի արտադրության և վերամշակման, բալիստիկ հրթիռային տեխնոլոգիաների կիրառման արգելքներ, սովորական զենքի մատակարարման էմբարգո , ինչպես նաև ճանապարհորդության արգելանքներ և ակտիվների սառեցում՝ ընդգրկված անձանց ու կազմակերպությունների նկատմամբ։
Ռուբիոն ընդգծել է, որ «դիվանագիտությունը դեռ մնում է տարբերակ», սակայն Իրանը պետք է համաձայնի անմիջական և բարի կամքով բանակցությունների ԱՄՆ-ի հետ՝ համաձայնության հասնելու համար։
Ինչպես հաղորդում է Reuters-ը, «Եվրոեռյակի» ԱԳ նախարարները հայտարարել են, որ կշարունակեն «օգտագործել դիվանագիտական ուղիները և բանակցություններ վարել»։ Ըստ հայտարարության՝ ՄԱԿ-ի պատժամիջոցների վերականգնումը «դիվանագիտության վերջը չէ»։
Եվրոպական երկրների ԱԳ նախարարներն Իրանին կոչ են արել ձեռնպահ մնալ «էսկալացիայի տանող ցանկացած գործողությունից և վերադառնալ իր իրավաբանորեն պարտավորեցնող երաշխիքների կատարմանը» Գործակալության տեղեկություններով՝ սեպտեմբերի 27-ին պատժամիջոցների վերականգնման ֆոնին, իրանական ռիալի փոխարժեքը հասել է նոր ռեկորդային ցածր մակարդակի։
Օգոստոսի 28-ին Մեծ Բրիտանիան, Ֆրանսիան և Գերմանիան սկսել էին Իրանի դեմ պատժամիջոցների վերականգնման գործընթացը, որոնք չեղարկվել էին 2015 թվականի միջուկային ծրագրի շուրջ համաձայնագրի շրջանակներում: «Եվրոեռյակն» Իրանից պահանջել է վերականգնել ՄԱԳԱՏԷ-ի տեսուչների մուտքը միջուկային օբյեկտներ, կարգավորել հարստացված ուրանի պաշարների հարցը և բանակցություններ սկսել ԱՄՆ-ի հետ:
Սեպտեմբերի 27-ին ՄԱԿ-ի Անվտանգության խորհուրդը չէր ընդունել երկու բանաձևերի նախագիծ, որոնք նախատեսում են երկարաձգել Իրանի նկատմամբ պատժամիջոցների չեղարկման ժամկետը: Սեպտեմբերի 27-ին Թեհրանը խորհրդակցությունների համար հետ էր կանչել Գերմանիայում, Ֆրանսիայում և Մեծ Բրիտանիայում իր դեսպաններին:
