ԱԺ ընդդիմադիր «Պատիվ ունեմ» խմբակցությունը ՀՀ վարչապետ Նիկոլ Փաշինյանին անվստահություն հայտնելու գործընթաց է սկսել: Խմբակցությունը պատրաստել ու հրապարակել է «Ազգային ճգնաժամի, կառավարման ձախողման հիմքերով ՀՀ վարչապետին անվստահություն հայտնելու մասին» Ազգային ժողովի հայտարարության նախագիծը:
«Փաշինյանի ղեկավարած կառավարությունը ոչ միայն չի կատարել իր պարտականությունները՝ էականորեն շեղվելով իր իսկ ներկայացրած և խորհրդարանական մեծամասնության հավանությանն արժանացած կառավարության ծրագրից, այլև չի կարողացել արդյունավետորեն արձագանքել պետության առջև ծառացած մարտահրավերներին՝ հաճախ դառնալով նոր մարտահրավերների առաջացման պատճառ։ Այսօրվա կառավարիչների գործունեությունը հանգեցրել է համակարգային ճգնաժամի պետական կառավարման բոլոր մակարդակներում: Այդ քաղաքականությունն աղետալի հետևանքներ է ունեցել ազգային անվտանգության, պետական ինքնիշխանության, ժողովրդավարության, սոցիալ-տնտեսական և ազգային կյանքի բոլոր ոլորտներում, լրջագույն խնդիրներ առաջացնելով Հայաստանի Հանրապետության համար՝ վտանգի տակ դնելով նաև երկրի ապագան»,- ասված է նախագծում:
Խմբակցությունը մի քանի կետով ներկայացրել է, թե տարբեր ոլորտներում ի՞նչ ձախողումներ է ունեցել կառավարությունը: Որպես օրինակ՝ ներկայացրել է Արցախի կորուստը, ռազմագերիների և Արցախի ռազմաքաղաքական ղեկավարության խնդիրը, ՀՀ տարածքային ամբողջականության խաթարումը, Հայոց ցեղասպանության միջազգային ճանաչման օրակարգի տապալումը, միակողմանի զիջումների գնալն Ադրբեջանի հետ գործընթացում, կառուպցիան, սոցիալ-տնտեսական խնդիրը, մարդկային ճգնաժամը և այլն:
«Փաշինյանն անդառնալիորեն կորցրել է կառավարելու լեգիտիմությունը։ Նրա շարունակական պաշտոնավարումը գոյության սպառնալիք է Հայաստանի Հանրապետության համար»,- հայտարարում է «Պատիվ ունեմ»-ն իր նախագծում։
Ըստ ընդդիմադիր պատգամավորների՝ այս պահին ազգային արտակարգ իրավիճակի միակ սահմանադրական լուծումն Ազգային ժողովի կողմից վարչապետին անվստահություն հայտնելու գործընթացն է, որը ենթադրում է հետևյալ քայլերի հերթականությունը.
- Վարչապետին անվստահություն հայտնելու գաղափարի շուրջ պատգամավորների կոնսոլիդացիա։
- Ազգային միասնության անցումային կառավարության ձևավորում, որի գերակայությունները պետք է լինեն՝
- կայունացնել ազգային անվտանգության իրավիճակը,
- վերականգնել օրենքի գերակայությունը, ազատ արձակել բոլոր քաղբանտարկյալներին և երաշխավորել ժողովրդավարական ազատությունները,
- վերականգնել հանրային համերաշխության մթնոլորտը,
- կազմակերպել ազատ, արդար և մրցակցային խորհրդարանական ընտրություններ,
- կասեցնել Հայաստանի միջազգային հեղինակության անկումը,
- զերծ պահել երկիրը տնտեսական ցնցումներից,
- միջազգային հարթակներում առաջ մղել ռազմագերիների և Արցախի ռազմաքաղաքական ղեկավարության վերադարձի հարցը:
«Պատիվ ունեմ»-ը կոչ է անում բոլոր քաղաքական ուժերին, քաղաքացիական հասարակությանը և անհատ քաղաքացիներին, ովքեր հավատում են Հայաստանի ապագային, «միավորվել իշխանափոխության այս պահին ամենաիրատեսական եղանակի՝ վարչապետին անվստահություն հայտնելու գործընթացի շուրջ»։
ԱԺ «Հայաստան» խմբակցությունը հունիսի 27-ին հայտարարել էր, որ միանում է Շիրակի թեմի առաջնորդ Միքայել արքեպիսկոպոս Աջապահյանի թեկնածությամբ անվստահության նախաձեռնությանը: «Պատիվ ունեմ» նույնպես հայտարարել էր իր պատրաստակամության մասին՝ աջակցելու արքեպիսկոպոսին իմփիչմենթի գործընթացի ընթացքում վարչապետի պաշտոնում առաջադրելու նախաձեռնությանը: Հատուկ հանձնարարություններով նախկին դեսպան, «Լուսավոր Հայաստան» կուսակցության ղեկավար Էդմոն Մարուքյանը հրաժարվել էր առաջադրել իր թեկնածությունը վարչապետի պաշտոնում՝ հօգուտ Աջապահյանի։ Արքեպիսկոպոսը, սակայն, կոչ էր արել չկապել իր անունը վարչապետի պաշտոնի թեկնածուների հետ։
