Ֆրանսիայի խոշոր քաղաքներում նոր բողոքի ցույցեր տեղի կունենան

Ֆրանսիայի բազմաթիվ խոշոր քաղաքներում այսօր բողոքի նոր ցույցեր են սպասվում՝ «Ամեն ինչ արգելափակեք» կարգախոսով զանգվածային բողոքի ցույցերից մի քանի օր անց, հաղորդում է «Ֆիգարո» թերթը՝ հղում անելով կոդավորված մեսենջերներում տարածված տեղեկատվությանը, գրում է «ՌԻԱ նովոստի»-ն։

Չորեքշաբթի օրը Ֆրանսիայում տեղի էին ունեցել զանգվածային բողոքի ցույցեր նույն կարգախոսով։ Ցուցարարները դեմ են 2026 թվականի բյուջեի օրինագծում առաջարկվող խնայողության միջոցառումներին։ Ներքին գործերի նախարարության տվյալներով՝ ամբողջ երկրում հարյուրավոր բողոքի ցույցերին մասնակցել է մոտ 200 հազար մարդ։ 80 հազար իրավապահ մարմինների աշխատակիցներ են տեղակայվել կարգուկանոնը պահպանելու համար։ Որոշ ցույցեր վերածվել են ոստիկանության հետ բախումների։

Հուլիսին Ֆրանսիայի այն ժամանակվա վարչապետ Ֆրանսուա Բայրուն ներկայացրել էր 2026 թվականի բյուջեի նախագիծը։ Իշխանությունները մտադիր էին մի շարք բյուջետային կետերի վրա խնայել շուրջ 43,8 միլիարդ եվրո՝ նախկինում նախատեսված 40 միլիարդի փոխարեն։ Կառավարության կողմից հայտարարված միջոցառումները մեծ վրդովմունք են առաջացրել ֆրանսիացիների շրջանում։