«Տաշիր» ընկերությունների խմբի նախագահ Սամվել Կարապետյանի պաշտպանության խորհրդի փաստաբանները գործարարի կալանքն անփոփոխ թողնելու դատարանի որոշումն իրավունքի ճգնաժամով են բացատրել՝ վերահաստատելով գործարարի կալանքի քաղաքական բնույթը։ Փաստաբանները նշել են, որ քրեական վարույթը ձևական բնույթ ունի, ապօրինի է, մինչդեռ իրավական պետության, օրենքի գերակայության դեպքում նա պետք է ազատ արձակվեր։ Ասուլիսը հեռարձակվել է Armenia Today-ի Youtube-ի ալիքում։
Կարապետյանի փաստաբան Արամ Վարդևանյանը հայտնել է, որ կալանքը երկարաձգելու դատական ակտը բաղկացած է շուրջ 104 էջից, որից 80%-ը պաշտպանական խմբի դիրքորոշումներն են։
«Դատական ակտի 10%-ն Առաջին անտյանի դատարանի մեջբերումներն են, բուն վերլուծությունը չնչին է։ Ըստ բովանդակության՝ քանի որ Կարապետյանն ունի հանրային ճանաչելիություն, հարգանք, վստահություն, կարող է խոչընդոտել գործի քննությանը։ Այն գործի քննությանը, որը վերաբերում է գոյություն չունեցող կոչին։ Կարճ ասած՝ Կարապետյանը կալանավորված է, որովհետև քննիչները, դատարանները, դատախազները մեզ ասում են՝ պետք է գնահատենք՝ ի՞նչ ազդեցություն է ունեցել նրա խոսքը»,- տեղեկացրել է Վարդևանյանը։
Փաստաբանները հստակեցրել են, որ մինչև կալանքի երկարաձգումը միջնորդել էին դադարեցնել և՛ կոչի, և՛ գործարարին վերագրվող փողերի լվացման դրվագներով հարուցված քրեական հետապնդումը։
«Ոչ մի փաստական տվյալ չունենալու պարագայում քննիչն ու դատախազը մերժել են նաև այս միջնորդությունները»,- հայտարարել են փաստաբանները։
Փաստաբան Արշակ Վարդանյանը տեղեկացրել է, որ Կարապետյանի գործով 51 անդամից բաղկացած քննչական խումբ կա։ Նա նշել է, որ պաշտպանական խումբը կարևորում է միջնորդությունների քննության ոչ թե դռնփակ, այլ հրապարակային լինելը։ Նրա համոզմամբ՝ նույնիսկ հանրությունը, հեռու լինելով իրավաբանությունից, դռնբաց նիստերի դեպքում կհասկանա, որ «դատական ակտերը չեն բխում դատալսումներից և առնվազն ընկալելի չեն»։
Կարապետյանի փաստաբան Ռուբեն Հակոբյանը պարզաբանել է, թե ինչո՞ւ չի կարելի գործարարի՝ կալանավորման առիթ դարձած, եկեղեցուն աջակցող խոսքը որակել որպես կոչ, ինչի վերաբերյալ եզրակացություն են տվել լեզվաբանները, բանասերները, հոգեբանները և այլ մասնագետներ:
«Իշխանությունը զավթելուն ուղղված կոչի հանցակազմի դեպքում նախ պետք է լինի կոչ, որը պետք է ուղղված լինի որոշակի անձանց՝ նրանց մեկ նպատակով համախմբելու համար․ բռնություն գործադրելու կամ բռնություն գործադրելու սպառնալիքով զավթել իշխանությունը։ Մեր հարցումներով մասնագետները նշել են, որ կոչը բաղկացած է 4 հասկացությունից՝ կանչ, լոզունգ, դիմում և հրավեր։ Մինչդեռ, Կարապետյանի նախադասությունը սեփական կարծիքի արտահայտումն է, որը չի պարունակում առհասարակ որևէ կոչ, առավել ևս՝ չի արտահայտում իշխանությունը զավթելուն ուղղված կոչ»,- հավելել է փաստաբանը։
Նա շեշտել է, որ այդ նախադասությամբ Կարապետյանը կոչով չի դիմում որևէ մեկին, որևէ մեկին չի հրավիրում, որևէ մեկին չի կանչում, այլ պարզապես արտահայտում է իր սեփական կարծիքը եկեղեցու շուրջ ծավալող դեպքերի մասին։ Հակոբյանը հավելել է, որ Կարապետյանի նախադասությունը գնահատողական ընդարձակ դատողություն է։
«Կարապետյանը ոչ թե իշխանության, այլ ժողովրդի ու եկեղեցու կողքին լինելու մասին է խոսում։ Եկեղեցուն և ժողովրդի աջակցության ձևերը հակաիրավական գործողությունների շրջանակ չեն ենթադրում»,- ավելացրել է փաստաբանը։
Վարդևանյանի խոսքով՝ երբ երկրում գործում է ռեպրեսիվ մեքենան, անտեսվում է ամեն ինչ, այդ թվում՝ իրավունքը, օրենսդրությունը, ինչը, սակայն, նրա համոզմամբ, երկար շարունակվել չի կարող։ Նա համոզված է՝ ռեպրեսիվ մեքենան ինչ-որ աստիճանի հասնելուց հետո դիմադրություն է ստանալու։
Հունիսին «Տաշիր» խմբի նախագահն աջակցել էր Հայ Առաքելական եկեղեցուն՝ հոգևորականների հասցեին իշխանությունների քննադատությունների ֆոնին։ Հունիսի 18-ին գործարարը երկու ամսով կալանավորվել էր՝ իբր իշխանությունը զավթելու կոչի մեղադրանքով:
Հուլիսի 4-ին Կարապետյանը հայտարարել էր, որ վարչապետ Նիկոլ Փաշինյանը և նրա կառավարությունն «անելիք չունեն Հայաստանում»։ Հուլիսի 14-ին գործարարը հայտնել էր նոր քաղաքական թիմի ձևավորման մեկնարկի մասին։ Օգոստոսի 15-ին դատարանը 2 ամսով երկարաձգել էր Կարապետյանի կալանքը, սեպտեմբերի 8-ին մերժել էր գործարարի խափանման միջոցը փոխելու միջնորդությունը։
Օգոստոսի 29-ին Երևանում տեղի էր ունեցել Կարապետյանի «Մեր ձևով» շարժման շնորհանդեսը։ Շարժումը, որն աշխատել է 5 ուղղությամբ, ծրագրային աշխատանքները կավարտի 4-5 ամսվա ընթացքում, որից հետո քաղաքական հայտ կներկայացնի։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
«Իրավական ամենաթողություն է»․ Սամվել Կարապետյանի փաստաբանները կբողոքարկեն կալանքը երկարաձգելու որոշումը
«Լսել մարդկանց և կիսել գաղափարները»․ կայացավ Սամվել Կարապետյանի «Մեր ձևով» շարժման շնորհանդեսը
