Ֆրանսիայի խորհրդարանն անվստահության քվե է հայտնել կառավարությանը

Ֆրանսիայի խորհրդարանը անվստահություն է հայտնել վարչապետ Ֆրանսուա Բայրուի կառավարությանը, հայտնել է BBC-ի ռուսական ծառայությունը։

Քվեարկության արդյունքում վարչապետն ստիպված կլինի հրաժարական տալ։ Նրա պաշտոնանկության և փոքրամասնության կառավարության լուծարման օգտին քվեարկել է 364 պատգամավոր, դեմ՝ 194-ը, ձեռնպահ՝ 25-ը։ Լրատվականը նշել է, որ 5-րդ Հանրապետության պատմության մեջ առաջին անգամ վարչապետը, որը նախկինում ստացել էր խորհրդարանի վստահությունը, հրաժարական կտա անվստահության քվեով։

ՏԱՍՍ-ի փոխանցմամբ՝ օգոստոսի 25-ին Բայրուն կառավարությանը վստահության հարցը խորհրդարան ներկայացնելու որոշումը հիմնավորել էր ճգնաժամային տնտեսական իրավիճակով, առաջին հերթին՝ պետական ​​պարտքի շարունակական աճով։ Հուլիսին Բայրուն ներկայացրել էր պետական ​​ծախսերը սահմանափակելու ծրագիր, որի շրջանակներում նախատեսում էր հրաժարվել կենսաթոշակների և սոցիալական այլ նպաստների բարձրացումից՝ փորձելով զսպել պետական ​​պարտքի աճը։

Այսօր կայացած լսումների ժամանակ ընդդիմության ներկայացուցիչները քննադատել են վարչապետին։ Գործակալությունը նաև հայտնել է, որ Ֆրանսիայի նախագահ Էմանուել Մակրոնը նախատեսում է առաջիկա օրերին նշանակել Ֆրանսիայի նոր վարչապետ։

Բայրուն վարչապետ էր նշանակվել 2024 թվականի դեկտեմբերի 13-ին։ Հունվարի 14-ին նա հիմնական ելույթով հանդես էր եկել Ազգային ժողովում և նրա ծրագիրը սուր քննադատության էր արժանացել «Չենթարկվող Ֆրանսիա»-ի կողմից։