Օգոստոսի 16-ին Ալյասկայում կայացած գագաթնաժողովում Ռուսաստանի նախագահ Վլադիմիր Պուտինն ու ԱՄՆ նախագահ Դոնալդ Թրամփը քննարկել են Ուկրաինայի պատերազմի հնարավոր լուծման տարբերակներ, գրում է Reuters-ը՝ հղում անելով իր աղբյուրներին։
Կայքի աղբյուրների փոխանցմամբ՝ քննարկված առաջարկները ենթադրում են, որ Ռուսաստանը կարող է հրաժարվել Ուկրաինայի որոշ փոքր հատվածներից, իսկ Կիևը՝ զիջել արևելյան որոշ տարածքներ, որոնք Մոսկվային մինչ այժմ չի հաջողվել գրավել։
Աղբյուրները հայտնել են Ռուսաստանի հիմնական առաջարկների կետերի մասին, որոնց թվում Ղրիմի նկատմամբ ինքնիշխանության միջազգային ճանաչման պահանջն է։
«Ըստ Պուտինի առաջարկի՝ Կիևը պետք է ամբողջությամբ դուրս գա Դոնեցկի և Լուգանսկի մարզերից։ Փոխարենը Մոսկվան խոստանում է «սառեցնել» ճակատը Խերսոնի և Զապորոժիեի մարզերում։ Ռուսաստանը պատրաստ է վերադարձնել փոքր տարածքներ Սումիի և Խարկովի մարզերից (մոտ 440 քմ․ կմ)»,- նշել են աղբյուրները։
Նշվում է, որ Ռուսաստանը պահանջում է նաև որոշ արևմտյան պատժամիջոցների վերացում, Ուկրաինայի անդամակցության արգելք ՆԱՏՕ-ին, ռուսերենի պաշտոնական կարգավիճակ, ռուս ուղղափառ եկեղեցու ազատ գործունեության իրավունք։
ՌԴ և ԱՄՆ նախագահները բանակցություններ էին վարել օգոստոսի 16-ի գիշերը։ Հանդիպումից հետո կողմերը, մասնավորապես, հայտարարել էին, որ համաձայնության են եկել Ուկրաինայի վերաբերյալ որոշ կետերի շուրջ, բայց մի շարք հարցերի առումով դեռևս համաձայնություն չկա։ Պուտինը շեշտել էր, որ առճակատման ժամանակն անցել է և Թրամփին հրավիրել է Մոսկվա։
