Ռուսաստանը հետախուզում է հայտարարել Եկատերինբուրգում ադրբեջանական սփյուռքի ղեկավար Շահին Շիխլինսկու նկատմամբ: Ռուսաստանի ՆԳՆ տվյալների բազայի համաձայն՝ նա հետախուզվում է քրեական գործի շրջանակում։
Շիխլինսկին բավականին կոշտ կերպով ձերբակալվել էր հուլիսի 1-ին՝ Եկատերինբուրգում, սակայն շուտով ազատ էր արձակվել։ Ըստ տեղեկությունների՝ միջադեպի ընթացքում տուժել էր իրավապահ մարմիններից մեկի ներկայացուցիչը։
Եկատերինբուրգի ադրբեջանական համայնքը հայտնվել է միջազգային աղմկոտ սկանդալի կենտրոնում՝ կապված իր անվանն առնչվող «Բաքու Պլազա» առևտրի կենտրոնում ձերբակալությունների հետ։
Սվերդլովսկի մարզի քննչական կոմիտեի մամուլի ծառայության տվյալներով՝ քաղաքում դադարեցվել է էթնիկ հանցավոր խմբավորման գործունեությունը, որը ենթադրվում է՝ առնչություն է ունեցել 2001, 2010 և 2011 թթ․ իրականացված սպանություններին։ Գործի շրջանակում ձերբակալվել են Այազ, Աքիֆ, Բաքիր և Մազահիր Սաֆարով եղբայրները, ինչպես նաև Ահլիման Գյանջիևը։ Ձերբակալվածներից երկուսը մահացել են․ ըստ պաշտոնական վարկածի՝ նրանցից մեկը՝ սրտային անբավարարությունից, իսկ մյուսի մահվան պատճառը դեռ պարզվում է։
Բացի դրանից, կալանավորվել է նաև Շիխլինսկու որդին՝ Մութվալա Շիխլինսկին՝ իշխանության ներկայացուցչի նկատմամբ բռնություն կիրառելու մեղադրանքով։
Ստեղծված իրավիճակը մեծ արձագանք է գտել Ադրբեջանում։ Ռուսաստանի գործերի ժամանակավոր հավատարմատար Պյոտր Վոլոկովը հրավիրվել է Ադրբեջանի ԱԳՆ՝ պարզաբանումների համար։ Ռուսաստանի նախագահի մամուլի խոսնակ Դմիտրի Պեսկովը նշել է, որ Բաքվի հետ բացատրական աշխատանքը շարունակվելու է։
Միջադեպի ֆոնին ադրբեջանական կողմը չեղարկել է Ռուսաստանի հետ նախատեսված մի շարք մշակութային և այլ միջոցառումներ։
