Ակտաուում կործանված Azerbaijan Airlines ուղևորատար ինքնաթիռի հարցով Ադրբեջանը փաստաթղթեր է պատրաստում միջազգային արդարադատության համակարգ դիմելու համար, ըստ ադրբեջանական լրատվամիջոցների՝ հայտարարել է Ադրբեջանի նախագահ Իլհամ Ալիևը։
Նրա խոսքով՝ Ադրբեջանը պարբերաբար դիմում է Ռուսաստանի Քննչական կոմիտեին, որտեղից պատասխանում են, որ հետաքննությունը շարունակվում է։
«Մենք անհամբեր սպասում ենք, թե ե՞րբ կավարտվի այս հետաքննությունը: Կարծում եմ՝ այս կերպ վարվելն անարդյունավետ չէ։ Դա չի նշանակում, որ մենք մոռանալու ենք դրա մասին»,- ասել է Ալիևը:
Նա Ռուսաստանին պատասխանատու է համարել տեղի ունեցած համար։
«Մեր պահանջը բնական է. թող ընդունեն իրենց մեղքը, նրանք, ովքեր խոցել են մեր ինքնաթիռը, պատժվեն, ինչպես նաև փոխհատուցում վճարեն զոհերին, վիրավորների ընտանիքներին»,- ասել է Ալիևը:
2025 թվականից Մոսկվայի և Բաքվի հարաբերությունները կտրուկ սրվել էին։ Առիթը 2024 թվականի դեկտեմբերի 25-ին Azerbaijan Airlines-ի ուղևորատար ինքնաթիռի կործանումն էր, որն Ադրբեջանը կապում է ռուսական ՀՕՊ համակարգի գործողությունների հետ և պահանջում է ընդունել մեղքը։
Ռուս-ադրբեջանական հարաբերությունները վատթարացել էին նաև ուժային գերատեսչությունների փոխադարձ գործողությունների ֆոնին։ ՌԴ քննչական կոմիտեն մեղադրանք էր առաջադրել Եկատերինբուրգում հարձակման ժամանակ ձերբակալված 6 ադրբեջանցիներից 5-ին: Ադրբեջանական դատարանը կալանավորել էր ՌԴ 8 քաղաքացու։ Հուլիսի 11-ին Մոսկվայում Ադրբեջանի քաղաքացիների զանգվածային ձերբակալություններ էին տեղի ունեցել։
Երկու կողմերը հետ էին կանչել դեսպաններին, չեղարկել մշակութային և խորհրդարանական միջոցառումները, ինչպես նաև հղել դիվանագիտական բողոքի նոտաներ:
