Թեհրանի քաղաքականությունը մնում է անփոփոխ և ուղղված է տարածաշրջանային աշխարհաքաղաքական քարտեզի ցանկացած փոփոխությանը հակազդելուն, Mehr-ի փոխանցմամբ՝ հայտարարել է Իրանի Ազգային անվտանգության բարձրագույն խորհրդի քարտուղար Ալի-Աքբար Ահմադիանը։
Ահմադիանը շեշտել է, որ Իրանի դիրքորոշումը համարում է օգտակար տարածաշրջանի բոլոր կողմերի համար։ Ըստ գործակալության՝ Ահմադիանի հետ հեռախոսազրույցի ընթացքում Հայաստանի անվտանգության խորհրդի քարտուղար Արմեն Գրիգորյանը քննարկել է տարածաշրջանային և երկկողմ հարցեր։
Գրիգորյանն Ահմադիանին տեղեկացրել է Ադրբեջանի հետ բանակցությունների վերջին զարգացումների մասին և ընդգծել, որ Հայաստանի դիրքորոշումը տարածաշրջանային տարանցիկ ուղիների վերաբերյալ չի փոխվել։
Ահմադիանն, իր հերթին, երախտագիտություն է հայտնել Իսրայելի՝ Իրանի վրա հարձակումը դատապարտելու հարցում Հայաստանի դիրքորոշման համար և վերահաստատել Իրանի հետևողական մերժումը տարածաշրջանի աշխարհաքաղաքական քարտեզի ցանկացած փոփոխության նկատմամբ։
Երկու կողմերն էլ ընդգծել են հատկապես տնտեսական ոլորտում երկկողմ հարաբերությունների ամրապնդման կարևորությունը։
ԱՄՆ-ում Թուրքիայի դեսպան Թոմ Բարաքը հուլիսի 14-ին հայտարարել էր, որ մասնավոր ամերիկյան ընկերությունը կարող է ստանձնել «Զանգեզուրի միջանցքի» կառավարումը՝ Բաքվի և Երևանի միջև խաղաղության բանակցությունները առաջ մղելու համար: Մասնավորապես, ԱՄՆ-ն կարող է 100 տարով վարձակալել Սյունիքի և Նախիջևանի միջև գտնվող 34 կիլոմետրանոց ճանապարհի հատվածը:
Հուլիսի 16-ին վարչապետ Նիկոլ Փաշինյանը հայտարարել էր ՀՀ կառավարության «Խաղաղության խաչմերուկ» նախագծում «գլոբալ խաղացողների» մասնակցության մասին՝ չհստակեցնելով, թե որ կազմակերպությունների և երկրների մասին է խոսքը:
Հուլիսի 18-ին ՀՀ-ում Իրանի դեսպան Մեհդի Սոբհանին մեկնաբանել էր Հայաստանի Սյունիքի մարզի տարածքով ճանապարհի վերահսկողությունն ԱՄՆ-ին արտապատվիրակելու հնարավորությունը և նշել, որ դա լրատվամիջոցների ենթադրությունն է։
