Հունիս և հուլիս ամիսներին Ռուսաստան է մուտք գործել հայկական ծիրանով բեռնված ավելի քան 1700 բեռնատար, հայտնել է Էկոնոմիկայի նախարար Գևորգ Պապոյանը։
Նրա խոսքով՝ հունիսի 1-ից հուլիսի 13-ը ՌԴ է մտել հայկական ծիրանով բարձված 1775 բեռնատար, ևս 117 բեռնատար այս պահին գտնվում են դեպի ՌԴ ճանապարհին։
Հուլիսի 1-ի դրությամբ՝ Հայաստանից ավելի քան 1300 բեռնատար ծիրան էր արտահանվել ՌԴ։
Ապրիլի կեսից Ռուսաստան և Բալթյան երկրներ արտահանման համար նախատեսված հայկական կոնյակով և ալկոհոլային այլ խմիչքներով բեռնատարները երկարատև ստուգումներ են անցնում տարանցիկ երկրում և մնում վրացական անցակետերում:
Մայիսի 13-ին և մայիսի 21-ին Հայաստանից կոնյակ արտահանողները բողոքի ակցիաներ էին իրականացրել ՀՀ-ում Վրաստանի դեսպանատան շենքի առջև՝ պահանջելով լուծում տալ իրենց ապրանքի արտահանման ժամանակ առաջացած խնդիրներին։ Հունիսի 19-ին ՊԵԿ-ը հայտնել էր, որ հայ-վրացական սահմանին հայկական շշալցված կոնյակով բեռնված բեռնատարների կուտակման հետ կապված խնդիրը կարգավորվել է։ Հունիսի 23-ին Պապոյանը հայտնել էր կոնյակի արտահանման հարցով Վրաստանի հետ պայմանավորվածության մասին։
