ՀՀ վարչապետի տիկին, «Իմ քայլը» հիմնադրամի տնօրեն Աննա Հակոբյանը Armenia Today-ի հարցմանն ի պատասխան ներկայացրել է Պեկինի մանկավարժական համալսարանում (Beijing Normal University) իր ուսումնառության ֆինանսական և տեխնիկական մանրամասները։
Ըստ նրա՝ ուսումնառությունն իրականացվում է կրթաթոշակի հիման վրա, որը կազմում է 3,2 մլն դրամ։
«Beijing Normal University-ում ուսանելու համար միջազգային ուսանողներին տրամադրվում է կրթաթոշակ՝ երկամյա ուսման ծախսերը հոգալու համար, որը կազմում է 60 000 RMB, և ես դիմել եմ՝ այդ հնարավորությունից օգտվելու համար»,- նշել է նա։
Հակոբյանը հայտնել է, որ կեցության ծախսերը հոգալու է «իր անձնական միջոցներով»։ Նա նաև պատասխանել է Չինաստանում գտնվելու ընթացքում անվտանգության աշխատակիցների ներգրավվածության մասին Armenia Today-ի հարցին՝ նշելով, որ ուսումնառության ողջ ընթացքում իրեն անվտանգություն չի տրամադրվելու։
«Երկու տարվա ընթացքում ապրելու եմ Պեկինում` ժամանակ առ ժամանակ Հայաստան գալով»,- տեղեկացրել է Հակոբյանը։
Armenia Today-ի հարցին, թե ինչո՞ւ է ընտրել «Չինական փիլիսոփայության» մագիստրոսական ծրագիրը, նա պարզաբանել է, որ իր ընտրությունը կյանքի փիլիսոփայությունն ավելի լավ հասկանալու նպատակով է։
«Կարծում եմ՝ մեզնից շատ տարբերվող մշակույթն ու փիլիսոփայությունն ուսումնասիրելն օգտակար կլինեն ինքներս մեզ ավելի լավ հասկանալու տեսանկյունից»,- հավելել է առաջին տիկինը։
Ավելի վաղ հայտնել էինք, որ Հակոբյանը սեպտեմբերին կմեկնի Չինաստան` երկամյա մագիստրոսական ծրագրով ուսանելու «Չինական փիլիսոփայություն» Պեկինի մանկավարժական համալսարանում (Beijing Normal University)։
