Իրավապահ մարմինները հունիսի վերջին երկամսյա կալանք են սահմանել արքեպիսկոպոսներ Բագրատ Գալստանյանի, Միքայել Աջապահյանի և ընդդիմադիր «Սրբազան պայքար» շարժման 15 կողմնակիցների նկատմամբ։ Աջապահյանին մեղադրում են իշխանության զավթման հրապարակային կոչեր անելու մեջ, իսկ Գալստանյանին և «Սրբազան պայքարի» կողմնակիցներին՝ հեղաշրջում կազմակերպելու փորձի։
Աջապահյանին ձերբակալելու փորձի ժամանակ հատուկ ջոկատայինները ներթափանցել էին Ամենայն Հայոց Կաթողիկոսի նստավայրի տարածք՝ Էջմիածնում։
Armenia Today-ի նկարահանող խումբը Երևանի և Էջմիածնի բնակիչներից հետաքրքրվել է նրանց կարծիքներով՝ կապված այդ կալանավորումների, այդ թվում՝ հոգևորականների ձերբակալման և իրավապահների գործողությունների հետ Սուրբ Էջմիածնի տարածքում։ Հարցվածների մեծամասնությունը բացասաբար է գնահատել հոգևորականների ձերբակալությունները և իրավապահների գործողությունները՝ ընդգծելով, որ Հայաստանում փաստացի գոյություն չունի իրավապահ համակարգ։
Միաժամանակ որոշ քաղաքացիներ, ովքեր նույնպես բացասաբար են գնահատել հոգևորականների ձերբակալությունները, նշել են, որ իրավապահները ստիպված են եղել և կատարել են հրաման։
«Ուրիշ բանուգործ չունեն, սաղ պարերը պարեցին, մնաց սարի սմբուլը»,- ասել է քաղաքացիներից մեկը:
Անդրադառնալով իրավապահների գործողություններին նա նշել է․ «Օրենք չկա, չէ, ի՞ նչ իրավապահ, կործանված երկիր է»։
«Սխալ բան էր դա, մենակ սրբազանը չէ, Կարապետյանն էլ», - հավելել է մեկ այլ քաղաքացի:
Մեկ ուրիշը այդ գործողությունները «լկտիություն» ու «տգեղ երևույթ» է որակել. «Մանավանդ սրբազանների հետ կապված, բոլորն անվանի մարդիկ են: Ինչ ասես՝ տեսանք: Սա ինչ տգիտություն է», - հավելել է նա:
Քաղաքացիներից մեկը նշել է, որ սահմանին առկա խնդիրները մի կողմ թողած՝ պայքար է տարվում սրբազանների դեմ:
«Պայքար եկեղեցու դեմ, անորոշ վիճակ է, նման բան երբեք չի եղել: Մեր Սուրբ Էջմիածին քաղաքը միշտ սրբավայր է եղել, ի՞նչ է նշանակում ուժային կառույցներին բերել», - շեշտել է նա:
Հարցման այլ մասնակից, դժգոհելով վարչապետի վարած քաղաքականությունից, ասել է․ «Ինչ, որ անում է Նիկոլը, աշխարհում ոչ մի թուրք չի կարողացել անել։ Սրբազանը մեր սրբությունն է»։
Հարցվածների մեջ կային մարդիկ, ովքեր պատասխանել են, որ կողմ են սրբազանների կալանավորումներին, և ըստ նրանց՝ այդ ամենը պետք է դեռ շատ վաղուց արվեր։
«Ճիշտ են արել, խախտել են եկեղեցու օրենքները։ Կոչ են անում տեռորի, որ ժողովրդին խփեն»,- շեշտել է մի քաղաքացի։
Մեկ այլ մասնակից մեր հարցին ի պատասխան՝ ասել է, որ, եթե պետությունը որոշել է կալանավորել սրբազաններին, ապա այդպես էլ պետք էր․ «Դա պետության խնդիրն է։ Կարիք կար սրբազաններին կալանավորելու, իրենց իրենց լավ չէին պահում»։
Մանրամասները՝ Armenia Today-ի տեսանյութում
