Սննդամթերքի անվտանգության տեսչական մարմինը ժամանակավորապես կասեցրել է Հայաստանում գործող «Տաշիր պիցցա» հանրային սննդի 4 մասնաճյուղի արտադրական գործունեությունը, տեղեկանում ենք ՍԱՏՄ-ի կայքից։
Ըստ տեսչական մարմնի՝ Երևանում գործող Հանրապետության 37, Հյուսիսային պողոտա 18/77, Էրեբունի 14 և Վանաձորի Տիգրան Մեծի 44/6 հասցեներում գործող մասնաճյուղերում խախտումներ, սանիտարահիգիենիկ նորմերի անհամապատասխանություններ են հայտնաբերվել, որոնք վերացնելու համար ժամկետ է սահմանվել:
ՍԱՏՄ-ն Վանաձորի մասնաճյուղում արձանագրել է, որ «առաստաղները և տանիքների ներքին մակերևույթները վնասված են, և չի բացառվել կեղտի կուտակումը, բորբոսի առաջացումը, մասնիկների թափվելու հնարավորությունը»:
Էրեբունու մասնաճյուղում, ըստ ՍԱՏՄ-ի, «հանրային սննդի կետի պատերը չեն ունեցել հարթ մակերես, պատրաստված չեն անջրանցիկ, չներծծող, լվացվող, ախտահանվող և ոչ թունավոր նյութերից, իսկ առաստաղները կառուցված չեն այնպես, որ կանխարգելվի կամ նվազեցվի կեղտի կուտակումը»։
«Հյուսիսային պողոտա 18/77 հասցեում գործող մասնաճյուղում հանրային սննդի կառույցի առաստաղները կառուցված չեն այնպես, որ կանխարգելվի կամ նվազեցվի կեղտի կուտակումը, գոլորշու խտացումը։ Հատակի որոշ հատվածներ չեն ունեցել հարթ մակերես, նորոգված չեն։ Հանրապետության 37 հասցեի մասնաճյուղում սննդամթերքի պատրաստման, մշակման կամ վերամշակման համար նախատեսված սննդի կառույցների հատակի մի մասը չի ունեցել հարթ-նորոգ մակերես»,- մասնավորապես ասված է ՍԱՏՄ հաղորդագրություններում։
Տեսչական մարմինը հունիսի 18-ին ժամանակավորապես կասեցրել էր «Պիցցա Տաշիր» հանրային սննդի 4 մասնաճյուղի, ինչպես նաև կաթնամթերքի արտադրամասի աշխատանքը։ «Պիցցա Տաշիր» ընկերությունը պատկանում է «Տաշիր» ընկերությունների խմբին, որի նախագահը Սամվել Կարապետյանն է: Նա հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների արշավը, որից հետո ՆԳՆ հատուկ նշանակության ստորաբաժանումները խուզարկություններ էին սկսել գործարարի տանը՝ Երևանում։ Վարչապետ Նիկոլ Փաշինյանը խիստ էր արձագանքել Կարապետյանի հայտարարությանը:
Հունիսի 18-ի գիշերը «Տաշիր» ընկերությունների խմբի նախագահին իր տնից բերման էին ենթարկել ՆԳՆ ոստիկանության քրեական ոստիկանության գլխավոր վարչություն։ ՔԿ-ն նրան մեղադրանք էր առաջադրել իշխանության բռնի զավթման հրապարակային կոչի համար: Նա մեղադրանքը չի ընդունում՝ այն որակելով շինծու, իսկ կալանքն՝ ապօրինի:
