ԱՄՆ-ն և Չինաստանը համաձայնության են եկել մայիսի 14-ից փոխադարձաբար նվազեցնել մաքսատուրքերը՝ նպատակ ունենալով մեղմել առևտրային դիմակայությունը, հայտնել է Սպիտակ տունը:
Ըստ ձեռք բերված պայմանավորվածության՝ ԱՄՆ-ն նվազեցնում է չինական ապրանքների վրա կիրառված մաքսատուրքերը՝ 145%-ից մինչև 30%, իսկ Չինաստանն ամերիկյան ապրանքների մաքսատուրքերը՝ 125%-ից մինչև 10%։
Այս մասին հայտարարվել է շաբաթներ շարունակված լարվածությունից հետո՝ մայիսի 10-ին Ժնևում կայացած հանդիպումից հետո, որին մասնակցել են Չինաստանի փոխվարչապետ Հե Լիպենգը և ԱՄՆ ֆինանսների նախարար Սքոթ Բեսենթը։ Ըստ ամերիկացի պաշտոնյայի՝ այս քայլով երկու գերտերությունները փոխադարձ մաքսատուրքերը կնվազեցնեն ընդհանուր 115%-ով:
ԱՄՆ նախագահ Դոնալդ Թրամփը «շատ լավ» և «կառուցողական» է որակել Ժնևում կայացած հանդիպումը՝ ընդգծելով, որ աշխարհի երկու խոշորագույն տնտեսությունները պայմանավորվել են «վերագործարկել առևտրային հարաբերությունները»։
Պեկինը փետրվարից էր ԱՄՆ-ից ներմուծվող մի շարք ապրանքների համար 10-15% մաքսատուրք սահմանել, ապա բարձրացրել այն՝ այսպես հակադարձելով Վաշինգտոնի որոշմանը, որով Չինաստանից ներմուծվող ապրանքների վրա 10%-ի չափով մաքսատուրքեր էր սահմանել։
