Կառավարությունն ապրիլի 17-ի նիստում հավանություն է տվել ԱԺ «Քաղաքացիական պայմանագիր» խմբակցության պատգամավոր Հայկ Սարգսյանի նախագծին, որով նա առաջարկել է խստացնել թմրամիջոցների ապօրինի շրջանառության հանցագործությունների համար նախատեսված քրեական պատասխանատվությունը։
Նախագծում նշվում է, որ ընդունման արդյունքում թիրախավորված կլինեն տեղեկատվական կամ հաղորդակցական տեխնոլոգիաների միջոցով, ինչպես նաև անչափահասի ներգրավմամբ թմրամիջոցների ապօրինի շրջանառությունը։
Մասնավորապես, առաջարկվում է ՀՀ քրեական օրենսգրքի 393-րդ հոդվածի 1-ին մասով նախատեսված արարքի համար (թմրամիջոցների, հոգեմետ նյութերի, դրանց պատրաստուկների կամ դրանց համարժեք նյութերի ապօրինի շրջանառությունն իրացնելու նպատակ կամ դրանք ապօրինի իրացնելը) գործող 3-6 տարվա ազատարզրկման փոխարեն նախատեսել 5-8 տարի ազատազրկում։
ՀՀ քրեական օրենսգրքի 393-րդ հոդվածի 2-րդ մասով (շահադիտական դրդումներով թմրանյութերի ապօրինի շրջանառություն) առաջարկվում է նախատեսել պատիժ՝ 8-12 տարի ժամկետով ազատազրկում՝ ներկայիս 4-8 տարվա փոխարեն։
ՀՀ քրեական օրենսգրքի 393-րդ հոդվածի 3-րդ մասով (խոշոր չափերով թմրանյութերի ապօրինի շրջանառություն) առաջարկվում է նախատեսել պատիժ՝ 14-20 տարի ժամկետով ազատազրկում կամ ցմահ ազատազրկում՝ գործող 4-8 տարվա փոխարեն։
ՀՀ քրեական օրենսգրքի 396-րդ հոդվածի 1-ին մասով (առանց իրացնելու նպատակի զգալի չափերով թմրամիջոց, հոգեմետ նյութ, դրանց պատրաստուկ կամ դրանց համարժեք նյութ, կամ պրեկուրսոր ապօրինի արտադրելը, պատրաստելը, վերամշակելը, ձեռք բերելը, պահելը, տեղափոխելը կամ առաքելը) նախատեսել պատիժ առավելագույնը 3 տարի ժամկետով ազատազրկում, ներկայիս 1 տարվա փոխարեն։ Նույն հոդվածի 2-րդ մասով պատգամավորն առաջարկել է նախատեսել պատիժ՝ 2-6 տարի ժամկետով ազատազրկում, ներկայիս 3-ի փոխարեն։ Նույն հոդվածի 3-րդ մասով առաջարկել է նախատեսել պատիժ՝ 4-8 տարի ժամկետով ազատազրկում՝ ներկայիս 5 տարվա փոխարեն։
Նածագծում նշվում է, որ 2024 թվականի ընթացքում արձանագրվել է համացանցի միջոցով թմրամիջոցների անօրինական շրջանառության 252 դեպք, որոնցից 62-ը թմրամիջոցներ իրացնելու դեպքեր են, իսկ 190-ը՝ ձեռքբերման:
«2023թ. ընթացքում հանրապետության իրավապահ մարմինների կողմից հայտնաբերվել է թմրամիջոցների, հոգեմետ (հոգեներգործուն) նյութերի և դրանց պրեկուրսորների հետ կապված հանցագործությունների 5070 դեպք, նախորդ տարվա 2266-ի դիմաց, գրանցվել է աճ 2804 դեպքով կամ 123,7%-ով: 2023թ. ընթացքում հանրապետության տարածքում արձանագրվել է առանց իրացնելու նպատակի թմրամիջոցների անօրինական շրջանառության 1762 դեպք, ինչը 1076 դեպքով ավելի է նախորդ տարվա համեմատությամբ (2022թ.՝ 686 դեպք): 2023թ․ հետախուզական միջոցառումների արդյուքնում բացահայտվել է համացանցի միջոցով թմրամիջոցների անօրինական շրջանառության 489 դեպք, որոնցից 128-ը իրացման դեպքեր են, իսկ 361-ը՝ ձեռքբերման (2022թ.՝ 134 դեպք, որոնցից 37-ը՝ իրացման, 97-ը՝ ձեռքբերման)»,- ասված է նախագծում։
Հունվարի 16-ին տարեկան ասուլիսսում ՆԳՆ նախարար Արփինե Սարգսյանն Armenia Today-ին հայտնել էր, որ թմրանյութերի ապօրինի շրջանառության դեպքերի նվազում և բավական մեծ հայտնաբերումներ կան, որոնք իրականացվել են թե՛ ոստիկանության, թե՛ իրավապահ համակարգի կողմից։
