Ավագանու արտահերթ ընտրություններ․ դիտորդները Գյումրիում և Փարաքարում խախտումներ են արձանագրել

«Անկախ դիտորդ» հասարակական դաշինքի դիտորդները մարտի 30-ին Գյումրիում և Փարաքարում մեկնարկած ավագանու ընտրություններում ժամը 9։30-ի դրությամբ ընթացակարգային խախտումներ է արձանագրել, հայտնել են դաշինքից։

Դիտորդներն այցելել են 32 տեղամաս, որից 25-ը՝ Գյումրիում, 7-ը՝ Փարաքարում։

«Տեղամասային ընտրական հանձնաժողովի նիստը 2 տեղամասում սկսվել է ուշացած, 3 տեղամասում արձանագրվել են ընթացակարգային խախտումներ, որոնք վերաբերել են անհրաժեշտ գործողությունների հերթականությանը: Մեկ տեղամասում հնարավոր չէր դիտարկել հանձնաժողովի անդամների գործառույթների վիճակահանությունը․ ՏԸՀ անդամների պնդմամբ՝ այն իրականացվել և արձանագրվել էր նախորդ օրը: Գյումրիի մեկ տեղամասում անբավարար է համարվել քվեարկության սենյակի տարածքը՝ քվեարկությունը կազմակերպելու համար»,- ասված է հրապարակման մեջ։

Նշվում է նաև ընտրատեղմասերում անբավարար լուսավորության և տարածքների մասին։

«Տեղամասերից 7-ում տարածքն անբավարար է ընտրողների և քվեասենյակում գտնվելու իրավունք ունեցող անձանց համար։ Քվեասենյակի լուսավորությունն անբավարար է 6 տեղամասում, քվեախցիկի լուսավորությունն անբավարար է 4-ում։ Քվեախցիկի դիրքը խնդրահարույց էր Գյումրիի մեկ տեղամասում․ հանձնաժողովի նախագահի ուշադրությունը գրավելուց հետո քվեախցիկների դիրքը փոխվել է։ Կահավորումն, ընդհանուր առմամբ, անհարմար է գնահատվել 2 տեղամասում»,- շեշտել են դաշինքից։

«Հայաքվե» նախաձեռնությունից տեղեկացրել են, որ Գյումրիի 31/69 ընտրատեղամասում 2-րդ, 5-րդ և 7-րդ համարների քվեաթերթիկների թիվը մյուսներից նկատելիորեն քիչ էր, բայց դիտորդի դիտարկումից հետո համաչափությունը վերականգնվել է։

Գյումրիում և Փարաքար համայնքում մարտի 30-ին ավագանու արտահերթ ընտրություններ են։

Գյումրու ավագանու արտահերթ ընտրություններին մասնակցում է 9 քաղաքական ուժ, կա քաղաքապետի 9 թեկնածու։ Նրանք են՝ ռեժիսոր և պրոդյուսեր Ռուբեն Մխիթարյանը, «Պատիվ ունեմ» խմբակցության անկուսակցական պատգամավոր Մարտուն Գրիգորյանը, «Մայր Հայաստան» դաշինքի թեկնածու Կարեն Սիմոնյանը, Գյումրու նախկին քաղաքապետ Վարդան Ղուկասյանը, «Եվրադաշինք» կուսակցությունների դաշինքից Լևոն Բարսեղյանը, «Քաղաքացիական պայմանագիր» կուսակցությունից՝ Սարիկ Մինասյանը, «Դեմոկարտական այլընտրանք» կուսակցությունից՝ Արտյոմ Ղարաղազարյանը, «Հայաստանի աշխատավորական սոցիալիստական» կուսակցությունից՝ Արտյոմ Թումանյանը և «Ապրելու երկիր» կուսակցությունից՝ Կարեն Մալխասյանը։ Փարաքար համայնքի ՏԻՄ ընտրություններում ՔՊ-ի ցուցակը գլխավորում է Լյուդվիգ Գյուլնազարյանը, «Միասնություն» կուսակցությունների դաշինքի ցուցակը՝ Վոլոդյա Գրիգորյանը, «Ազգային առաջընթաց» կուսակցության թեկնածուն Դավիթ Մինասյանն է, իսկ «Կայունություն» կուսակցության թեկնածուն՝ Գոռ Սարիբեկյանը:

Փարաքարի ընտրություններում ՔՊ-ի ցուցակը գլխավորում է Լյուդվիգ Գյուլնազարյանը, «Միասնություն» կուսակցությունների դաշինքի ցուցակը՝ Վոլոդյա Գրիգորյանը, «Ազգային առաջընթաց» կուսակցության թեկնածուն Դավիթ Մինասյանն է, իսկ «Կայունություն» կուսակցության թեկնածուն՝ Գոռ Սարիբեկյանը: