Հայաստանի վարչապետ Նիկոլ Փաշինյանը փետրվարի 19-ին քաղաքացիներին ուղղված ուղերձում հայտարարել էր Հայաստանի նոր Սահմանադրության ընդունման համար համաժողովրդական հանրաքվե անցկացնելու անհրաժեշտության մասին: Վարչապետը ներկայացրել էր «Իրական Հայաստանի» գաղափարախոսության նախագիծը, որն ավելի վաղ առաջ էին քաշել ՀՀ իշխանությունները։
Փաշինյանը փետրվարի 27-ին քաղաքացիներին հրավիրել էր «Իրական Հայաստանի» գաղափարախոսության նախագծի քննարկմանը։ Մասնավորապես, նա առաջարկել էր կառավարության շենքում հավաքվել 20-30 հոգանոց խմբերով՝ հայեցակարգն «անկաշկանդ մթնոլորտում» քննարկելու համար։ Նշել էր, որ եթե ձևավորվեն 70 և ավելի հոգանոց խմբեր, ինքն անձամբ կայցելի նրանց բնակավայրեր և դասախոսություն կանցկացնի։
Armenia Today-ը հարցում է անցկացրել երևանցիների շրջանում՝ պարզելու նրանց վերաբերմունքը Փաշինյանի նախաձեռնությանը, նաև հարցրել ենք՝ պատրաստվո՞ւմ են մասնակցել քննարկմանը և ի՞նչ առաջարկներ ունեն կառավարության ղեկավարի վերաբերյալ։
Հարցվածների մեծ մասը բացասական է արտահայտվել իշխանությունների նախագծի մասին։ Գրեթե բոլոր հարցվածները հայտարարել են, որ չեն մասնակցի «Իրական Հայաստանի» գաղափարախոսության նախագծի քննարկմանը, որին իրենց հրավիրել է կառավարության ղեկավարը:
Հարցվածներից մեկը երկրի իշխանությունների նախագիծը հայ հասարակության համար «հերթական թակարդ» է անվանել։
«Ինչո՞ւ պետք է մասնակցենք մի բանի, որն ընդհանրապես աղերս չունի մեր ինքնության, արժեքների, արժանապատվության և պատվի հետ: Այն հակահայկական նախաձեռնություն է, որի նպատակը ժողովրդին անվտանգային օրակարգից շեղելն է։ Հերթական խայծն է, որը մատուցում են հանրությանը»,- նշել է տղամարդը։
Քննարկման հրավիրելու Փաշինյանի գաղափարը քաղաքացիներից մեկն «աբսուրդ» է որակել, որին չի պատրաստվում մասնակցել:
«Հուսով եմ՝ Հայաստանի բնակչության գիտակից մասը պետք է նույն դիրքորոշումն ունենա։ Սա նման է այն իրավիճակին, երբ ասում էր՝ սաղավարտներ գնեք ու մասնակցեք պատերազմին։ Հիմա էլ առանց զենքի գնում ենք թուրքին հանձնվենք։ Այն, ինչ կատարվում է, սարսափելի է»,- ասել է նա։
Մեկ հարցված էլ նշել է, որ Փաշինյանը պետք է նախ ինքը պատրաստվի, հետո նոր քաղաքացիների հետ այդ հարցը քննարկի։
«Եթե քննարկմանը մասնակցեի, կառաջարկեի իջեցնել բոլոր գները, քանի որ ժողովուրդն այդպես չի կարողանում ապրել։ Իրական Հայաստանը հզոր Հայաստանն է, որի համար պետք է շատ աշխատել»,- ընդգծել է քաղաքացին։
Մեկ այլ քաղաքացի էլ հայտարարել է, որ Հայաստանի իշխանություններն ընդունակ չեն լուրջ քայլերի։
«Նրանք ոչ մի լուրջ բան չեն անում։ Պարզապես վարկաբեկում, արժեզրկում են Հայաստանը, եկեղեցին, կրթությունը։ Ամեն ինչ ոչնչացնում են։ Մենք հայտնվել ենք ծանր ու աղետալի իրավիճակում։ Ժամանակին մասնակցել ենք հեղափոխությանը, բայց խաբվել ենք։ Իրենք հայկական իշխանություն չեն, թուրքերի շահերն են պաշտպանում, թուրքերի դրածոներն են»,- հայտարարել է տարեց տղամարդը։
Մանրամասները ՝ տեսանյութում:
