Վարչապետ Նիկոլ Փաշինյանը ժողովրդին ուղղված ուղերձում հայտարարել է Հայաստանի նոր Սահմանադրության ընդունման համար համապետական հանրաքվե անցկացնելու անհրաժեշտության մասին։
Ըստ նրա՝ նախկինում անցկացված բոլոր հանրաքվեներն «առնվազն հանրային ընկալման մեջ ունեն լեգիտիմության լրջագույն պակաս»։
Փաշինյանը նշել է, որ ժողովուրդը, քաղաքացին պետք է ինքն իրեն ընկալի ոչ միայն որպես պետության հիմնադիր, այլև պետության մեջ հաստատված իրավակարգի աղբյուր,սահմանադրական կարգն ընկալի որպես համակեցության՝ իր մասնակցությամբ ձեռք բերված համաժողովրդական պայմանավորվածություն:
«Այս համակարգի համար էական է համաժողովրդական հանրաքվեով նոր Սահմանադրության ընդունումը, քանի որ գործող Սահմանադրության ընդունման համար անցկացված նախկին բոլոր հանրաքվեներն առնվազն հանրային ընկալման մեջ ունեն լեգիտիմության լրջագույն պակաս: Նոր Սահմանադրության ընդունման ռազմավարական նպատակն անցումն է պետականազուրկ ազգի ռելիկտային (մնացորդային) գործելակարգից դեպի պետականակերտ ժողովրդի գործելակարգ»,- ասել է նա:
Հայաստանի արդարադատության նախարար Սրբուհի Գալյանը հունվարի 25-ին հայտարարել էր, որ իշխանությունները մտադիր են մինչև 2026 թվականի խորհրդարանական ընտրությունները նոր Սահմանադրության տեքստ ունենալ։
2024 թվականի սեպտեմբերի 27-ին Փաշինյանը հայտնել էր ՀՀ սահմանադրությունը փոխելու հնարավորության մասին՝ Ադրբեջանի հետ խաղաղության պայմանագիր կնքելու համար։ Բաքուն նախկինում մի քանի անգամ հայտարարել էր, որ Հայաստանը պետք է փոխի իր Սահմանադրությունը։
Փաշինյանը նաև անդրադարձել է «իրական Հայաստանի» գաղափարախոսությանը, որը, ըստ նրա, պետք է առաջնորդող գաղափարախոսություն դառնա ոչ միայն կառավարության ու խորհրդարանական մեծամասնության, այլև Հայաստանի յուրաքանչյուր քաղաքացու համար։
Փաշինյանի խոսքով՝ «իրական Հայաստանի» գաղափարախոսությունը ձևակերպված չէ, ամբողջականացված չէ, ամփոփված չէ մի փաստաթղթի մեջ, որտեղ հնարավոր լինի ծանոթանալ և որդեգրել»։
«Այս ուղերձի առանցքային նպատակն է այսօր ձեզ ներկայացնել իրականի գաղափարախոսության նախագիծը, որն այս ընթացքում մշակել ենք»,- ասել է նա։
Փաշինյանը հավելել է, որ նոր գաղափարախոսության նախագիծը բաղկացած է 14 դրույթից։ Դրանցից նա նշել է «հայրենիքը պետությունն է, սիրո՞ւմ ես հայրենիքդ, ուժեղացրու պետությունդ» կետը։ Ըստ նրա՝ հայրենիքը հայերի լեզվամտածողության ամենանվիրական հասկացություններից է, բայց այն չի առնչակցվում իրավունքների և պարտականությունների համակարգին, ունի աշխարհագրական ընկալման տարբերակներ և ընկալումներ:
Նա ասել է, որ ազգ և ժողովուրդ հասկացությունները հաճախ նույնացվում են: Բայց քաղաքական դիտանկյունից դրանք, նրա խոսքով, էականորեն տարբերվում են՝ շարունակելով փոխկապակցված լինել մեկը մյուսին:
««Այստեղ պետություն՝ այստեղ հաց, այստեղ հայրենիք՝ այստեղ կաց» դրույթի ներքո նա նշել է, որ պետությունը սեփական բախտը որոշելու, ճակատագիրը կանխորոշելու լավագույն գործիքն է քաղաքացու և ժողովրդի համար, և մարդու լավագույն կյանքը հնարավոր է միայն իր պետության մեջ: Հաջորդ կետում նա առանձնացրել է, որ հարստանալը և հարստացնելը հանրային բարեկեցություն հաստատելու առանցքային խթան են, և այս խթանը պետք է տեղավորել ոչ թե փողի հետևից մրցավազքի, այլ արդյունք ստեղծելու համար մրցակցության՝ անհատին և պետությունը զարգացնող տրամաբանության մեջ:
Որպես գաղափարախոսության մեկ այլ սկզբունք՝ նա նշել է, որ «խաղաղությունը հարևանների միջավայրում առանց կողմնակի աջակցության ապրելու հմտությունն է»։ Վարչապետի կարծիքով՝ խաղաղությունն արտաքին հարաբերությունների վերջնանպատակն է:
Ըստ Փաշինյանի՝ «իրական Հայաստանի» գաղափարախոսությունը հիմնված է հայ ժողովրդի ազգային արժեքների վրա։ Դրանց թվում նա նշել է, մասնավորապես, հենց Հայաստանի Հանրապետությունը, անկախությունը, ինքնիշխանությունը, քաղաքացիությունը, ժողովրդավարությունը, բանակը, Հայաստանի պատմությունը, բանահյուսությունը, Հայոց լեզուն և գրերը, հայկական սփյուռքը։
Նա նաև որպես ազգային արժեքներ առանձնացրել է ընտանիքը, անհատը, քրիստոնեությունը, Հայ Առաքելական եկեղեցին, Հայ Կաթողիկե և Ավետարանական եկեղեցիները, հայկական ժողովրդական երաժշտությունը, խոհանոցը։ Ըստ Փաշինյանի՝ ազգային արժեքների մեջ է մտնում նաև «հայրենի բնաշխարհը՝ իր կենսաբազմազանությամբ»։
Մանրամասները՝ տեսանյութում։
