Փետրվարի 24-ին բժիշկներին ծեծի ենթարկած անձինք ձերբակալվել են, նրանց մոտ հայտնաբերվել է դեղնականաչավուն զանգված, տեղեկացրել է ՆԳՆ խոսնակ Նարեկ Սարգսյանն՝ անդրադառնալով Առողջապահության նախարար Անահիտ Ավանեսյանի գրառմանը, որով նա հայտնել էր շտապօգնության բժիշկներին բռնության ենթարկելու դեպքի մասին։
Սարգսյանը նշել է, որ բժիշկներին ծեծի ենթարկելու դեպքը տեղի է ունեցել Լեոյի փողոցում, ահազանգն ստացել են ժամը 23։45-ին։ Ոստիկանները պարզել են, որ բժիշկներին ծեծի ենթարկած անձինք սթափ չէին։
«Պարեկները նշված վայրում հայտնաբերել և բաժին են տեղափոխել Արմավիր քաղաքի 37-ամյա և Մեծամոր քաղաքի 20-ամյա բնակիչներին։ Պարզվել է, որ տղամարդիկ ալկոհոլի ազդեցության տակ վատ զգալու համար շտապօգնություն են կանչել և վեճի բռնվել աշխատակիցների հետ։ 37-ամյա տղամարդու անձնական խուզարկությամբ հայտնաբերվել են 6 գրամից ավելի դեղնականաչավուն զանգվածով երկու փաթեթ և դեղնականաչավուն զանգվածով գլանակ։ 20-ամյա մեծամորցու անձնական խուզարկությամբ հայտնաբերվել է դեղնականաչավուն զանգված»,- մանրամասնել է խոսնակը։
Սարգսյանը նշել է, որ կազմված փաստաթղթերը ներկայացվել են նախաքննական մարմին։
Փետրվարի 25-ին Առողջապահության նախարար Անահիտ Ավանեսյանը տեղեկացրել էր, որ գիշերը շտապօգնության բժիշկներ են բռնության ենթարկվել։
Փետրվարի 21-ին ՀՀ ՆԳՆ-ն տեղեկացրել էր, որ Շիրակի մարզի Ազատան գյուղում տարեց տղամարդու որդին մոխրամանով հարվածել էր հորն օգնություն ցույց տվող բուժաշխատողին։ Ոստիկանները ձերբակալել էին բժշկին բռնության ենթարկած 44-ամյա տղամարդուն։
Shamshyan.com-ը գրել էր, որ փետրվարի 21-ին բռնության ենթարկված բուժակը Մհեր Քոլոյանն է, իսկ նրա նկատմամբ ոտնձգություն կատարողը՝ Ախուրյանի նախկին ոստիկանապետերից մեկի ազգականը:
