Բլոգեր Վարդան Ղուկասյանի «Դեմոկրատիա, օրենք և կարգապահություն» կուսակցությունն (6,8%) առաջ է անցել ընդդիմադիր «Հայաստան» դաշինքից (6,5%), իսկ իշխող «Քաղաքացիական պայմանագիրն» ստացել է ամենացածր միավորները (11%) հարցումների ողջ ընթացքում։ Այս մասին են վկայում MPG/Gallup International Association-ի կողմից հունվարի 20-22-ը Հայաստանում 1100 քաղաքացիների շրջանում անցկացված հեռախոսային հարցման տվյալները։
Ըստ MPG-ի ղեկավար Արամ Նավասարդյանի՝ Հայաստանի քաղաքացիների 11,3%-ը պատրաստակամություն է հայտնել կողմ քվեարկել «Քաղաքացիական պայմանագրին», եթե հաջորդ կիրակի անցկացվեին խորհրդարանական ընտրություններ։ Ղուկասյանի կուսակցության օգտին պատրաստ է քվեարկել հարցվածների 6,8%-ը, «Հայաստան» դաշինքի օգտին կքվեարկի հարցվածների 6,5%-ը։
«Հարցվածների 2,4%-ն ասել է, որ կքվեարկի «Բարգավաճ Հայաստանի» օգտին»։ «Պատիվ ունեմ»-ի օգտին պատրաստ է քվեարկել 2,3%-ը։ Հարցվածների 1,8%-ն ասել է, որ կքվեարկի «Հանրապետություն» կուսակցության օգտին։ Հարցվածների 0,9%-ն ասել է, որ կքվեարկի «Լուսավոր Հայաստան» կուսակցության օգտին։ 0,5%-ը ձայն կտա Բագրատ Գալստանյանի «Սրբազան պայքար»-ին, 0,2%-ը՝ «Ազգային-ժողովրդավարական բևեռ»-ին, 0,1%-ը՝ «Քրիստոնեա-ժողովրդավարական» ու «Արդար Հայաստան» կուսակցություններին»,- եզրափակել է Նավասարդյանը։
13,3%-ը ձայն չի տա ոչ մեկին, 10,2%-ը հրաժարվել է պատասխանել հարցին, 15,4%-ը դժվարացել է պատասխանել, իսկ 27,2 տոկոսը հայտնել է, որ չի մասնակցի ընտրություններին։
2024 թվականի հուլիսին Հայաստանի քաղաքացիների ավելի քան 30%-ը պատրաստ էր մասնակցել խորհրդարանական ընտրություններին, եթե դրանք նախատեսված լինեին հաջորդ կիրակի։ Անցյալ տարվա հուլիսի 3-6-ը անցկացված MPG-ի հարցման համաձայն՝ հարցվածների 14,4%-ն ասել էր, որ կողմ է քվեարկելու «Քաղաքացիական պայմանագրին», 3,7%-ը նախընտրել էր «Հայաստան» դաշինքին, 3,5%-ը՝ «Դեմոկրատիա, օրենք և կարգապահություն» կուսակցությանը։
