Բարձր տեխնոլոգիական արդյունաբերության նախարար Մխիթար Հայրապետյանը չի բացառել, որ ռուս լրագրող և հեռուստահաղորդավար Դմիտրի Կիսելյովի հաղորդումը կարող է Հայաստանում արգելափակվել։ Նախարարն այդ մասին ասել է ԱԺ-ում՝ մեկնաբանելով համառուսաստանյան պետական հեռուստատեսության եթերում թողարկված «Շաբաթվա լուրեր» հաղորդման պատճառով ՀՀ-ում ՌԴ Սերգեյ Կոպիրկինին հունվարի 15-ին ՀՀ ԱԳՆ կանչելու որոշումը։
«Հեռուստահաղորդավարի կողմից արհեստական գեներացված անընդունելի թեզեր, խոսույթներ են շրջառության մեջ դրվել, որոնք դեմ են Հայաստանի ինքնիշխանությանն ու տարածքային ամբողջականությանը։ Այս հանգամանքով պայմանավորված, այո՛, հնարավոր է հաղորդումը Հայաստանում փակելու հարց առաջանա»,- ասել է նախարարը։
Նա տեղեկացրել է, որ նախարարությունն աշխատանքային կարգով բողոք է ներկայացրել Հեռուստատեսության և ռադիոյի հանձնաժողով։
«Հանձնաժողովի արձագանքից հետո կառավարությունը դրա հիման վրա կհստակեցնի իր անելիքները։ Կիսելյովի հաղորդումը ՀՀ-ում կարող է արգելափակվել»,- հստակեցրել է Հայրապետյանը։
Անդրադառնալով 2024-ի մարտին Հայաստանի տարածքում լրագրող Վլադիմիր Սոլովյովի հեղինակած հաղորդումների հեռարձակումն արգելափակելու որոշմանը՝ նա նշել է, որ, իրենց տպավորությամբ, «հայ հեռուստադիտողը կարոտով չի սպասում այդ հաղորդմանը»։
«Հետևաբար, մեր երկրում հեռարձակվող բոլոր հաղորդումներն իրենց բովանդակությամբ պետք է համապատասխանեն օրենսդրությամբ սահմանված կարգին։ Կարծում եմ՝ կառավարության ակնկալիքը լեգիտիմ, արդար և օբյեկտիվ է»,- ընդգծել է նա։
Հունվարի 15-ին Կոպիրկինը կանչվել էր ՀՀ ԱԳՆ, ուր դեսպանին բողոքի հայտագիր էին հանձնել։ Ըստ հրապարակման՝ պատճառը հունվարի 12-ին Ռուսաստանի համառուսաստանյան պետական հեռուստատեսության եթերում թողարկված «Շաբաթվա լուրեր» հաղորդումն է։
Հայրապետյանը հայտնել էր, որ Հայաստանը 2025 թվականի հունվարին կրկին առաջարկներ կներկայացնի Ռուսաստանին՝ հանրային մուլտիպլեքսում ռուսական հեռուստաալիքների հեռարձակման վերաբերյալ։ Հոկտեմբերին ներկայացված առաջարկներն անպատասխան էին մնացել։
2024 թվականի դեկտեմբերի 17-ին «Փաստ» օրաթերթը գրել էր, որ իշխանությունները Հայաստանում ռուսական հեռուստաալիքներն ամբողջությամբ եթերազրկելու վերջնական որոշում ունեն։ Նույն օրն Armenia Today-ին ԲՏԱ նախարարությունից հայտնել էին, որ այդ պահին նշված թեմայով մեկնաբանություն չունեն։
Նույն տարվա ապրիլի 15-ին ԲՏԱ նախարարը մեկնաբանել էր ՀՀ-ում ռուսական հեռուստաալիքների հեռարձակման հնարավոր արգելքը։ Նա վստահեցրել էր, որ Հայաստանի նպատակը ոչ թե ռուսական հեռուստաալիքները փակելն է, այլ Երևանի և Մոսկվայի միջև զանգվածային հաղորդակցության ոլորտում համագործակցության միջկառավարական համաձայնագիրը վերանայելը։
2024-ի ապրիլի 10-ին Հայրապետյանը չէր բացառել, որ Հայաստանը կարող է միակողմանի խզել ՀՀ և ՌԴ կառավարությունների միջև ստորագրված «Զանգվածային հեռահաղորդակցության ոլորտում համագործակցության մասին» միջպետական համաձայնագիրը: Մարտի 30-ին «Հայաստանի հեռուստատեսային և ռադիոհաղորդիչ ցանցը» (ՀՀՌՑ) հայտնել էր Սոլովյովի հեղինակած հաղորդումների հեռարձակումն արգելափակելու մասին։
