Շիրակի մարզի Ամասիայի տարածաշրջանի գյուղերից մեկի ոռոգման ջրատարի համար նախատեսված բետոնե ավազանում փրկարարները հայտնաբերել են 18-ամյա աղջկա մարմինը, հայտնում է shamshyan.com-ը։
Ըստ կայքի՝ մահացածը որպես անհետ կորած որոնվող 18-ամյա Գրետա Զ.-ն էր:
Դեպքի փաստով Ամասիայի քննչական բաժնում նախաձեռնվել է քրեական վարույթ: Քննիչի որոշմամբ նշանակվել է դիակի դատաբժշկական փորձաքննություն:
ՀՀ ՆԳՆ փրկարար ծառայությունը հայտնել է, որ Բյուրակն գյուղի բնակիչներից մեկի անհետացման մասին ահազանգն ստացել են հուլիսի 11-ին՝ ժամը 10:43-ին։ Որոնողական աշխատանքներին մասնակցել են համագյուղացիներ, ոստիկանության աշխատակիցներ, ներգրավվել է նաև անօդաչու թռչող սարք:
