Ռուսաստանցի քաղաքագետ, ռազմական փորձագետ Ալեքսանդր Խրամչիխինը Armenia Today-ին տված հարցազրույցում մեկնաբանել է ԱՄՆ Կենտրոնական հետախուզական վարչության տնօրեն Ուիլյամ Բըրնսի և Ռուսաստանի հետախուզական վարչության ղեկավար Սերգեյ Նարիշկինի վերջին այցերը Հայաստան:
Փորձագետն ընդգծեց, որ այցերի պատճառների վերաբերյալ հստակ տեղեկատվություն չկա և հնարավոր չէ որևէ բան հաստատ ասել։ «Կարելի է ենթադրել, որ ԱՄՆ-ն ուզում է պոկել Հայաստանը Ռուսաստանից, իսկ Ռուսաստանն, ընդհակառակը, ցանկանում է պահպանել այն, չնայած այս դեպքում տեսականորեն չի բացառվում, որ ԱՄՆ-ն և ՌԴ-ն իրար հետ ինչ-որ բան են քննարկել, իսկ Հայաստանը հայտնվել է միջնորդի դերում, բայց, անշուշտ, մենք ոչ մի բան չգիտենք», – ասել է նա:
Ըստ Խրամչիխինի, տեսականորեն խոսքը կարող է գնալ Հարավային Կովկասում իրավիճակի հնարավոր սրման մասին, հաշվի առնելով Ալիևի հայտարարությունները այն մասին, որ Ռուսաստանը չի ապահովում Լեռնային Ղարաբաղի վերաբերյալ պայմանավորվածությունների կատարման ընթացքը, և այն, որ Թուրքիան ու Ադրբեջանը, երևում է, ցանկություն ունեն օգտվել նրանից, որ Ռուսաստանը շատ զբաղված է Ուկրաինայում։ «Բայց որքանով է դա իրականացվում, չգիտեմ, ամեն ինչ կարող է լինել», – հավելել է ռազմական փորձագետը:
Մեկնաբանելով Ռուսաստանի լիբերալ-դեմոկրատական կուսակցության ղեկավար Սերգեյ Նարիշկինի հայտարարությունն այն մասին, որ ՌԴ-ն բավականաչափ ուժեր ու ռեսուրսներ ունի դաշնակիցներին ու բարեկամներին պաշտպանելու համար, Խրամչիխինը հայտարարել է, որ այդ ուղերձն ակնհայտորեն ուղղված է եղել Ադրբեջանին: «Թեև այդ հայտարարությունը պարտադիր դեմագոգիայի շարքից է, բայց այն հստակորեն հասցեագրված է Ադրբեջանին և կրկին Թուրքիային», – ընդգծել է փորձագետը:
