Նատալյա Ռոտենբերգը մամուլի ասուլիս է հրավիրել՝ հայտնելու իր հեռացման պատճառը։
«Այսօր տեղեկացա, որ ես այլևս Հայաստանի մարմնամարզության ֆեդերացիայի փոխնախագահը չեմ, և, հետևաբար, իմ և ֆեդերացիայի միջև համագործակցությունը դադարեցված է։
Հաշվի առնելով այն հանգամանքը, որ ֆեդերացիան իր պաշտոնական հայտարարության մեջ չի նշել պատճառները, ես ինքս որոշեցի ներկայացնել նման որոշման իրական դրդապատճառը»,- ասվում է Ռոտենբերգի հայտարարության մեջ:
Նշվում է, որ վաղը՝ մարտի 30-ին` ժամը 12:00-ին, Ռոտենբերգը «Գոլդեն Փելես» հյուրանոցում հանդես կգա մամուլի ասուլիսով, որում կպատմի ստեղծված իրավիճակի մանրամասները։ Այս կապակցությամբ նշվում է, որ հրավիրված են «բոլոր այն լրագրողները, ովքեր անտարբեր չեն Հայաստանում տեղի ունեցող անարդարությունների նկատմամբ»։
Հիշեցնենք, որ հայտնի գործարար Տիգրան Արզաքանցյանի կինը՝ Նատալյա Ռոտենբերգը, այլևս Հայաստանի մարմնամարզության ֆեդերացիայի փոխնախագահը չէ։ Այս մասին ասվում է Ֆեդերացիայի հայտարարության մեջ։ Նշվում է, որ ՀՄՖ-ն դադարեցնում է համագործակցությունը նրա հետ։ Հիշեցնենք, որ բալետի նախկին պարուհի Նատալյա Ռոտենբերգը գեղարվեստական մարմնամարզության ֆեդերացիայի փոխնախագահ է նշանակվել այս տարվա փետրվարի 4-ին։
