«Քաղաքացիական պայմանագիր» կուսակցության նեկայացուցիչ Հայկ Կոնջորյանի եղբորը՝ Ավետ Կոնջորյանին, ծեծի ենթարկելու կապակցությամբ 1 անձ է ձերբակալվել։ Տեղեկությունն Armenia Today-ին հայտնել է Քննչական կոմիտեի մամուլի խոսնակ Կիմա Ավդալյանը։
Ըստ նրա՝ դեպքի առթիվ ՔԿ Կոտայքի մարզային քննչական վարչությունում նախաձեռնվել է քրեական վարույթ՝ մի խումբ անձանց կողմից ֆիզիկական ներգործության և խուլիգանության հատկանիշներով:
Քրեական վարույթի նախաքննությունը շարունակվում է՝ միջադեպի մյուս մասնակիցներին հայտանբերելու ուղղությամբ, նշել է Ավդալյանը։
Այսօր՝ հուլիսի 27-ին, համացանցում տարածվել էր տեսանյութ, որը վերագրվում էր Կոնջորյանի եղբոր «դաժան ծեծին»։
Armlur-ի տեղեկություններով՝ Կոնջորյանին ծեծի են ենթարկել Կոտայքի մարզում գործող բարձրահարկ շենքերի կառուցմամբ զբաղվող «Միլլոն Մայնինգ» ընկերության տնօրեն Բաբկեն Հովակիմյանն ու վերջինիս «մաֆիան»՝ Հովակիմյանի ընտանեկան վարորդ Ռոբերտ Սարգսյանը, Աբովյան համայնքի ավագանի Նաիրի Հակոբյանը, շատերին հայտնի Էլլարի Սաքոն, ով հանդիսանում է ավագանու անդամ Նաիրի Հակոբյանի ընկերը, Բաբկեն Հովակիմյանի ընկեր արցախցի Գրիշա Գրիգորյանը և ոմն Ազատ Շահոյան:
