«Բարգավաճ Հայաստան» կուսակցության կալանավորված առաջնորդ Գագիկ Ծառուկյանին պատկանող «Առինջ մոլ» առևտրի կենտրոնի աշխատակիցներն ու ձեռնարկատերերը բողոքի ակցիա են կազմակերպել՝ պահանջելով թույլ տալ վերականգնել աշխատանքը հուլիսի 21-ից փակված տաղավարներում։
Քննչական կոմիտեն կնքել է առաջին գծում գտնվող մոտ 300 առևտրի տաղավարներից 24-ը, ինչպես նաև մեքենաների կայանատեղին։ Ակցիայի մասնակիցների խոսքով՝ ներկա է 200 խանութի 3-ական աշխատող՝ մոտավորապես 600 մարդ։ Ուղիղ հեռարձակումն իրականացրել է Armenia Today-ի You Tube-յան ալիքը։
Իրավապահները որպես պատճառ նշել են շենքերը մոտակա բարձրավոլտ էլեկտրահաղորդման գծերի տակ գտնվելու փաստը։
Նրանք պահանջել են, որ Քննչական կոմիտեից գան ու աշխատակիցներին ու տնտեսվարողներին պատասխան տան, թե խանութները բացվելու են թե չէ, եթե ոչ՝ ինչու, եթե այո՝ երբ, որ մարդիկ հասկանան խնդիրը կլուծվի մի օրի՞ց, մի ամսից թե երբ։
«Հարյուրավոր զանգեր ենք ստանում, ասում են, ոնց, դուք չեք փակվե՞լ։ Նրանց մտածում են, որ ողջ մոլն է փակ»,- պատմեց նրանցից մեկը։
Ձեռնարկատերերն ասացին, որ կնքումը կատարվել է ոչ աշխատանքային օր՝ առանց աշխատակիցների և խանութների սեփականատերերի նախնական ծանուցման։ Երեքշաբթի օրը եկել են աշխատանքի, տեսել են, որ տաղավարները փակ են։
Ձեռնարկատերերը պատրաստակամություն հայտնեցին մասնակցել հնարավոր խախտումների վերացմանը, եթե խնդիրն իսկապես կապված է անվտանգության պահանջների հետ։
«Եթե սա վերաբերում է «Հայաստանի էլեկտրական ցանցերին», թող նրանք լուծեն խնդիրը։ Եթե դա վերաբերում է պետությանը կամ սեփականատերերին, մենք նույնպես պատրաստ ենք օգնել մեր սեփական միջոցներով։ Գլխավորն այն է, որ մեր տաղավարները հնարավորինս շուտ վերաբացվեն»,- Armenia Today-ին ասաց բողոքի ակցիայի մասնակիցը։
Քննչական կոմիտեն ձեռնարկատերերին առաջարկել էր ժամկետ՝ իրենց տարածքները բացելու համար, որպեսզի նրանք կարողանան տեղափոխել իրենց ապրանքները։ Սակայն խանութների սեփականատերերը հայտարարեցին, որ չգիտեն, թե ուր տեղափոխել դրանք և պահանջում են թույլտվություն շարունակել առևտուրը։
«Շուկան 15-20 օրա ցնցումների մեջ է, 15 օր հարկայինն էր մուտքերի մոտ կանգնած մեքենաներն էր ստուգում։ Հիմա էլ էս վիճակը։ Շուկային վեց ամիս պետք է որ ուշքի գա»,- նշեց տնտեսավարողներից մեկը։
Ակցիայի մասնակիցները նշել են, որ բարձրավոլտ հոսանքագծերը շուկայի հարևանությամբ են գտնվում տարիներ շարունակ, և չեն հասկանում, թե ինչու հարցը բարձրացվեց հենց հիմա։
Աշխատակիցները տեղի ունեցածը կապում են Ծառուկյանի նկատմամբ քրեական հետապնդման հետ և պահանջում են «չքաղաքականացնել» առևտրի կենտրոնի աշխատանքը։ Ակցիայի որոշ մասնակիցներ հայտարարել են, որ իշխանությունները միտումնավոր չեն փակում ամբողջ շուկան միանգամից՝ լայնածավալ բողոքներից խուսափելու համար։ Նրանց խոսքով՝ առևտրի կենտրոնի տարածքում աշխատում էմի քանի հազար մարդ։
Տնտեսվարողները նշել են, որ ավտոկայանատեղու և մուտքերից մեկի փակ լինելու պատճառով խաթարվել է ամբողջ շուկայի աշխատանքը։ Փողոցի կողմից մուտքը փակված է դեղին ժապավենով, ինչի հետևանքով այցելուները, տեսնելով փակ հատվածը, կարծում են, որ ամբողջ առևտրի կենտրոնը չի աշխատում։ Արդյունքում հաճախորդներ են կորցնում նաև այն խանութները, որոնք կապարակնքված չեն և պաշտոնապես կարող են շարունակել աշխատանքը։
Խանութի սեփականատեր Զարուհի Պետրոսյանը Armenia Today-ին հայտնել է, որ պարապուրդի շարունակությունը կարող է հանգեցնել աշխատատեղերի կորստի։ Նրա խոսքով՝ տնտեսվարողները նույն պայմաններում աշխատել են 10 տարի, սակայն բարձրավոլտ հոսանքագծերի հարցը բարձրացվել է միայն հիմա։
Ավելի ուշ վատացել է «Առինջ մոլի» աշխատակցի առողջական վիճակը և Շտապօգնություն են կանչել։
Հանրախանութի փոխտնօրեն Արմեն Ներսիսյանը հայտնել է, որ առողջական խնդիր ունեցող աշխատակիցը գտնվում է վատ վիճակում աշխատավայրում ստեղծված անորոշ իրավիճակի պատճառով։
Բժիշկներն անհրաժեշտ օգնություն են ցուցաբերել նրան ու հեռացել։
Բողոքի ակցիայի ժամանակ վիճաբանություն է ծագել ձեռնարկատերերի և ոստիկանի միջև։
Ոստիկանության աշխատակիցը Armenia Today-ին ասաց, որ մասնակիցների գործողությունները վկայում էին ճանապարհը փակելու մտադրության մասին, և կոչ արեց «չանել այս արկածախնդիր քայլը»։
Բողոքի ակցիայի մասնակիցները պատասխանեցին, որ բարձրավոլտ էլեկտրահաղորդման գծերի պատճառով սահմանափակումները իրականում չեն վերաբերում բոլոր բիզնեսներին։ Ոստիկանության աշխատակիցը, ի պատասխան այն բողոքների, որ փակ մուտքը զրկում է բաց խանութներին հաճախորդներից, հայտարարեց, որ բիզնեսները «ինքնուրույն փակել են իրենց խանութները»։
Աշխատակիցները լրատվականներին հայտնել են, որ վաղը նույնպես հավաքվելու են հանրախանութի մոտ նույն պահանջով։ Նրանց խոսքով՝ հաջորդ ակցիային ավելի շատ աշխատակիցներ և առևտրային կետերի սեփականատերեր կմիանան։
