Ֆրանսիայում 2027 թվականի հունվարից արգելվում է 15 տարեկանից փոքր անձանց մուտքը սոցիալական ցանցեր, հայտնել է BBC-ն։
Ֆրանսիան դարձել է առաջին եվրոպական երկիրը, որը կարգելափակի պատանիների մուտքը սոցհարթակներ։ Երկրի խորհրդարանում ու սենատում ընդունված օրենքը նշանակում է, որ Ֆրանսիայում բոլորը պետք է հաստատեն իրենց տարիքը՝ սոցիալական ցանցեր մուտք գործելու համար, և դա տեղի է ունենում այն ժամանակ, երբ Մեծ Բրիտանիան և ԵՄ-ն մշակում են իրենց սեփական սահմանափակումները՝ ի պատասխան երեխաների հոգեկան առողջության վերաբերյալ մտահոգությունների։
Ֆրանսիայի նախագահ Էմանուել Մակրոնը ողջունել է այս քայլը։ Նա խոստացել էր օրենքը ներդնել իր պաշտոնավարման տասնամյակի ավարտին։ Շատերը կասկածի տակ են դրել օրենքի կենսունակությունը, սակայն կառավարությունը պնդել է, որ տարիքային ստուգումներ կիրառելու համար նախատեսված առցանց գործիքներն արդյունավետ և անվտանգ են։
Արգելքը կիրականացվի երկու փուլով. նախ՝ սեպտեմբերից 15 տարեկանից փոքր անձինք չեն կարողանա հաշիվներ բացել, և բոլոր նոր հաշիվների համար պարտադիր կլինի տարիքի ստուգում։ Ապա 2027 թվականի հունվարին կանոնը կգործի բոլոր առկա հաշիվների համար, ինչը նշանակում է, որ Ֆրանսիայում բոլորն անխտիր պետք է ապացուցեն, որ 15 տարեկանից բարձր են՝ սոցիալական ցանցերից օգտվելու համար։
«Ռոյթերս»-ի փոխանցմամբ՝ արգելքի ուժի մեջ մտնելուց հետո սոցիալական ցանցերի հարթակները պետք է օգտագործեն Ֆրանսիայի գաղտնիության կարգավորողի կողմից հաստատված տարիքի ստուգման գործիքներ։
Սակայն մտահոգություններ են առաջացել գաղտնիության, տարիքի ստուգման գործիքների արդյունավետության, երիտասարդների կողմից դրանք շրջանցելու ռիսկերի և արգելքի մշակման ու ներդրման արագության վերաբերյալ, հաղորդում է «Ֆրանս Պրես» գործակալությունը։
Գործակալությունը հավելել է, որ Ֆրանսիայի թվային տեխնոլոգիաների նախարար Անն Լե Էնանֆը պաշտպանել է օրենքի կիրառման արագությունը քվեարկությունից առաջ, «քանի որ տարիքի ստուգման գործիքներն արդեն գոյություն ունեն»։
Ֆրանսիան երկրորդ երկիրն է, որը արգելք է մտցրել՝ Ավստրալիայից հետո։ Չնայած Ավստրալիան դեկտեմբերին արգելել էր 16 տարեկանից փոքր անձանց մուտքը սոցիալական ցանցեր, լայնորեն ընդունված է, որ շատերը շարունակում են օգտագործել այդ հարթակները։
Մարտին Ավստրալիայի էլեկտրոնային անվտանգության հանձնաժողովը հայտարարել էր, որ 16 տարեկանից փոքր 10 երեխայից 7-ը, ովքեր արգելքից առաջ ունեցել են սոցիալական ցանցերի հաշիվ, դեռևս ունեն «որոշակի մուտք»։
Հաշվի առնելով սա՝ Արևմտյան Ավստրալիայի Քուրթին համալսարանի ինտերնետային ուսումնասիրությունների պրոֆեսոր Թամա Լիվերը BBC-ին ասել է, որ արգելքը «ձախողվել է» իր տեխնիկական նպատակներում։ Սակայն, նրա խոսքով, այն հաջողությամբ ցույց է տվել, որ արգելքը «կարող է իրականացվել», չնայած դասակարգում է որպես «մի փոքր փորձ»։
Մյուս երկրները կարող են սովորել այս օրինակից, որ «երիտասարդները պետք է լինեն այս զրույցի մասնակից», որպեսզի արգելքը «կատարվի նրանց հետ», այլ ոչ թե «նրանց համար»։
Լիվերն ասել է, որ Ֆրանսիայի արգելքը կարող է ավելի մեծ հաջողության հավանականություն ունենալ՝ յուրաքանչյուր անձի տարիքն ստուգելու պահանջի պատճառով, բայց դա նաև կբարձրացնի անձնական կյանքի գաղտնիության ռիսկերը։
Նա հավելել է, որ արգելքի լրացուցիչ ռիսկերից են երիտասարդներին մղելը դեպի ավելի քիչ կարգավորվող առցանց տարածքներ, նրանց նորությունների սպառման և քաղաքական լիազորությունների կրճատումը։
Վերջին մի քանի ամսվա ընթացքում Եվրոպայում արագորեն տարածվում է սոցիալական ցանցերին երիտասարդների մուտքը սահմանափակող օրենսդրությունը։
